Nghiyalasha Elisha Haulyondjaba, okwa popile omupresidende Hage Geingob omanga pethimbo lya faathana a kondema omapopyo ga ningwa komuleli gwoDTA McHenry Venaani ta ti, oga nika oshiponga.
Sho a yamukula koshinyolwa shoNamibian Sun shomomasiku, 11 gaApilili nuumvo. Komufala nale gwopolisi ngoka e li moshipundi shevululuko okwa popi kutya okwa haluthwa okuuva Venaani ta popi kutya iilyo nale yoKoevoet noSWATF oya dheulilwa uukwaita nuuna ngele oya ihumbatelwa nayi otayi vulu okuninga oongundu dhuukulo ngaashi oBoko Haram yaNigeria noISIS.
Haulyondjaba okwa popi kutya omapopyo gaVenaani inaga yela.
Okwa popi kutya shoka omupresidende Geingob a popi kombinga yiilyo mbyoka nale oshi li mosndjila na otaya tsu kumwe nasho.
Okwa popi kutya oonakukondjela emanguluko oyendji oya hulithila moluhepo inaya pewa niilonga molwaashoka yamwepo mboka ya pewa iilonga iilyo nale yoKoevoet noSWATF .
Okwa popi kutya shoka osha ningwa omolwa omusindalandu gwedhiminathanepo na ogwa gumu mboka ya kondjela emanguluko lyoshilongo. Haulyondjaba okwa popi kutya omaindilo ngoka taga ningwa kiilyo mbyoka kage li mondjila.
Okwa popi kutya opwa piti owala omasiku omashona sho kwa dhimbulukiwa esiku lyaCassinga, niilyo mbyoka oyi li oshitopolwa shaamboka ya ningi oshiponokela dhoka nokudhipaga aantu oyendji moCassinga. Komanda gwoKoevoet nale Hans Dreyer okwa li a lopota kutya iilyo yoPLAN ya thika po-6000 oya kwatwapo, naHaulyondjamba okwa pula kutya aantu mboka oya ningwa shike. Molwaashoka oye shi shi kutya yamwe oya dhipagwa noyekelwa mefuta.
Okwa pula aanapolotika ya hulithepo omukalo gwokulongitha pambambo omapopyo ngoka taga vulu okuthwako nayi.
PLACIDO HILUKILWA