Opolisi mOshitopolwa shaHangwena otayi tula miilonga oompango dhoka dha nuninwa okuhulitha po iimbuluma koongamba dhoshilongo, unene pokati kaNamibia naAngola.
Oongamba dhopaigwana dhaNamibia naAngola odha tendwako owala kondjila yomamanya na ka pe na odhalate ya sha ndjoka tayi topola iilongo mbyoka, onkene aakwashigwana ohaya taaguluka oongamba ya manguluka okuya ya konge omakwatho guunamiti, okukatalelapo oofamili nokukonga uulithilo wiimuna yawo.
Kwiikwatelelwa komupopiliko gwopolisi yaHangwena, Kaume Itumba, iimbuluma nomiyonena dhilwe otadhi longwa pakulongitha oongamba dhoka dha eguluka mwa kwatelwa eeto lyiingangamithi moshilongo, omakaya oshowo uulunga wiihauto mbyoka tayi yakwa moshilongo nokufalwa moAngola.
Okwa lopotwa kutya iihauto oyindji mbyoka ya yakwa mOnooli yaNamibia oya falwa mevi lyaAngola moka kwa lopotwa muna ongeshefa yiihauto mbyoka ya yakwa.
Itumba okwa popi kutya ngashiingeyi oya tulapo oompango nongele ope na mboka taya ka pumbwa okuya moshilongo meendelelo okukonga nando omakwatho gopaunamiti uusiku nena oya pumbwa okutseyithila opolisi yopopepi nayo.
Okwa ti, opolisi otayi ka kala nokupatolola oongamba dhoka naamboka taya ka monika taya taaguluka oongamba uusiku netango inali pita, otaya ka ungaungiwa nayo.
Okwa pula aakwashigwana ya longithe omahala gokupitila ngoka ga tulwa po uuna taya taaguluka oongamba ihe haku pita owala kehe mpoka.
PLACIDO HILUKILWA