Ngoloneya gwoshitopolwa shoka Lawrence Sampofu okwa koleke kutya nonando inaku gandjwa omakwatho gopaulumomhumbwe omolwa efundja moshitopolwa shoka, ooskola ndatu okwa tegelelwa dhi ka pate omiyemo mEtitano ndika ta taalela omolwa ondjele yomeya miishana.
Aalongiskola naanaskola poskola yaMpukano, Muzii naNankuntwe, tadhi adhika mUuzilo wOshitopolwa shaZambezi oya taalela uupyakadhi wefundja.
Sampofu okwa popi kutya okwa ningi omakonaakono omasiku ga piti na okwiimoneneko ye mwene kombinga yuupyakadhi mboka wa taalela kooskola dhoka.
Sampofu okwa popi kutya nonando aanaskola yamwe ohaya zi momihandjo dhopakathimbo dhoka dha ningwa pooskola dhoka, aanaskola yamwe ohaya longitha uukanona okuya nokuza koskola mokutaagulaka omeya ngoka naashoka otashi tula moshiponga oomwenyo dhawo.
"Iishana mbyoka oya ya muule nomeya otaga endelele noonkondo. Ope na woo oshiponga shomayoka noondjambameya," ngoloneya a yelitha
Okwa popi kutya ooskola dhoka otadhi ka patulula mbala omiyelo dhawo okuza mefudho, opo dhi tsikile mpoka dha hulile neilongo.
“Ngoloneya gwOshitotopolwa shaKavango East, Samuel Mbambo okwa popi kutya moshitopolwa she inamu lopotwa natango onkalo ndjoka yokutululula aantu nenge egandjo lyomakwatho gomeendelelo omolwa efundja.
Olopota yondjele yomeya ndjoka ya pitithwa kehangano lyoNamibia Hydrological Services oya holola kutya Oshitopolwa shaKavango oshi na ondjele yomeya ya yelekwa noometa 8.27 momasiku ga6 gaApilili ihe oya shuna pevi poometa 7.90 momasiku 11.
Ondjele yomeya momulonga gwaZambezi moKatima Mulilo oya hulithapo okuya pombanda na oyi li poometa 5.64 okutameka momasiku ga8 gaApilili.
Nonando ondjele yomeya oya shuna pevi moRundu, ooyene yoomagumbo gaayenda oyendji otaya longitha uukanona mokufala nokukutha komagumbo ngoka aayenda yawo.
Pieter Peypers gwo n’Kwazi Lodge popepi noRundu okwa popi kutya ondjila ndjoka ya ya kehala lyawo otayi ka pata uule womwedhi opo ku tegelelwe ondjele yomeya yi shune pevi.
Okwa popi kutya onkalo ndjoka ohayi eta uuwanawa nuuwinayi kongeshefa yawo ngaashi aatalelipo oyendji ohaya longitha onkalo ndjoka mokutala uushitwe omanga yamwe haya ka konga omilalo palwe.
Okwa popi kutya oya kala miilonga uule woomvula 20 ihe ndjika omvula onti-6 taya longitha uukanona. Peypers okwa popi woo kutya ekandulpo lyomukundu okutunga oontopa pomapitilo gomeya.
JANA-MARI SMITH