Omukiintu gwoomvula 25 okwa yahwa okusa sha ningilwa pondunda yomanwino yedhina Osho Bar momudhingoloko gwaOkuryangava mOvenduka, Etitano lya piti.
Pauyelele wa gandjwa kopolisi, Julien Kauika okwa umbu sekuriti nekende sha etitha sekuriti emuumbe nondjembo noku mu yaha.
MoSwakopo, omuhingi gwotaxi okwa tulwa miipandeko ta tamanekelwa oshipotha shonkambadhala yedhipago sho a yaha omulumentu momutse.
Palopota yopolisi, nakuyahwa okwa ponoele omukiintu ngoka a li ta popi mongodhi na okwe muthanga nokumuyeka ongodhi.
Omuhingi gwotaxi ngoka a mono nkene oshimbuluma shoka tashi ningwa okwa lamba mo nolugodhi olwa tameke pokati kaalumentu mboka sha etitha omuhingi gwotaxi akuthemo ondjembo.
Oshikuti osha zi kondjembo ndjoka nokuyaha omulumentu ngoka momutse na okwa falwa meendelelo mOvenduka opo a pewe epango.
Momukunda Oipanda mOshikandjohogololo shaOutapi, he yokamati koomvula 16 okwa lundile omukiintu gwoomvula 54 kutya okwa kwata okanona ke onkonga mehuliloshiwike.
Omukiintu ngoka nokamati hoka aniwa oya zip o puundunda womanwino oshita. Omukiintu otaku popiwa aniwa adhenge okamati noshiti nokonima okwe ka kondjitha kaye miihulo naye.
Warrant Officer Linekela Shikongo okwa popi kutya opolisi natango otayi konaakona na kapuna ngoka atulwa manga miipandeko.
Shikongo okwa popi kutya opolisi ohayi kuthako aluhe omalundilo gomakwatonkonga noonkondo na otaya konaakona oshipotha shoka ngaashi naana haku konaakonwa uuna naku tulamo oshipotha omukiintu.
MOnayema mOkahao, omukiintu gwoomvula 23 okwa kwatwa onkonga momasiku gaali gaApilili kohonda ye nale.
MoRundu, omulumentu gwontumba okwa kwata onkonga omukiintu gwoomvula 22 omanga ali kohi yodhungo. Nakutamanekwa okwa tulwa miipandeko.
Oshipotha shonkonga shimwe osha lopotwa mOmukunda Makanga mOshitopolwa shaZambezi, sho omunamivo 23 omulumentu a kwata onkonga omukadhona gwoomvula 18.
OMUTOOLINKUNDANA GWOMENI
Category: