Oshikondo shiikundaneki moshilongo oshi li moluhodhi omolwa eso lyomutoolinkundana Corry Ihuhua ngoka a hulitha mOsoondaha ya piti mepupi lyoomvula 42.
Ookume ke oyendji oshowo aaniilonga pamwe naye miikundnaeki oya hokolola nakusa onga omudhilaadhilo omuwanawa ngoka a a landula aluhe omadhilaadhilo. Omolwa ohokwe ye onga omutoolinkundana okwiimonene oompito dhiilonga dha yooloka
ngaashi moNamibia Press Agency (Nampa), The Namibian, The Villager, Namibian Sun oshowo NBC TV. Corry okwa hulitha mOsoondaha konima yuuwehame wethimbo efupi moshipangelo mOvenduka. MoNamibian Sun Corry okwa longa onga omudhindi gwoonkundana dhomaudhano sho a wayimine oshikundaneki muMay gwo-2011 nokonima okwa yewa nokuninga omupeha omudhindi gwoonkundana, iilonga mbyoka a kala nayo sigo oMaalitsa gwo-2013.
Omutoolinkundana, Liz Haltrup, ngoka a li omundungiki mopoloyeka yomadheulo yoMedia Training Project (MTP) moomvula dho-1990, okwa hokolola kutya ota dhimbuluka Corry onga omulumentu omunankondo naaluhe omwiimemehi.
Opoloyeka ndjoka oya totwapo mo-1991 nelalakano lyokudheula aatoolinkundana moshilongo.
Opoloyeka ndjoka oya kala nokupewa omakwatho gopashimaliwa kehangano lyaashi lyopapangelo lyaDenmark. Corry okwa li woo omudhindi gwoonkundana moshifokundaneki shoMTP. “Corry okwa li owala e na oomvula 20 ihe okwa li nale omudhindi gwoonkundana dhomaudhano moshifokundaneki moAugstineum moka a longo onga omukalelipo gwaanaskola nomukomeho gwospana yuudhano wo rugby,” Haltrup ta ti.
“Corry okwa li gumwe gwomaanaskola aanamagano na onda nyanyukwa sho a tsikile eilongo lye moshikondo shiikundaneki onga omutoolinkundana okwa longa onga omutoolinkundana nomudhindi gwoonkundana sigo opethimbo sho a hulitha.” Isack Hamata, ngoka e li kuume kaCorry nomutoolinkundana pamwe naye okwa popi kutya nakusa omuntu gwaantu ngoka a li a pewa oshipewa shokutunga uukume naantu aanyasha, aakokele, aathigona naakengeli. “Moshikondo shiikundaneki Corry kali owala omutoolinkundana omuwanawa ihe okwa li woo omushangi omuwanawa,” Hamata ta ti.
“Otwa tsakanene naye moomvula dho-1990 sho a wayimine oNampa, konima owala sho a manitha eilongo lye moMedia Training Project, moka ngame nangame nda mono woo omadheulo.Okwa li a shambulandje niilonga ye na okwa ulikwa aninge omutoolinkundana omukuluntu mo-Swakopmund. Opo omunyasha omushona a pewe oshinakugwanithwa shi li ngaaka otashi ti sha kombinga yiilonga ye.
Onga omukomeho gwoonkundana dhomaudhano onda pewa oshinakugwanithwa shokugandja omadheulo kaanambelewa ayehe yopaitopolwa moonkundana dhomaudhano. Onda li nda nyanyukila ontseyo ye yomaudhano unene oompango dhomaudhano ga yooloka. Okwa li gumwe gwomaatoolinkundana aaluudhe mboka ya vulu okulopota kombinga yuudhano wocricket nogolf oshowo onga omudhani gworugby moAgustineum. Eso lye otali uvitha nayi noonkondo.”
Omutoolinkundana pamwe naye Confidence Musariri okwa hokolola kombinga yaCorry ta ti, uuna wu li naye moonkundathana omuntu omuwanawa ihe nge tashiya pombaapila okwa li ta vulu okugandja omadhilaadhilo ge a manguluka naashoka oshe mu ningitha aningie omutoolinkundana gwoonkundana dhomaudhauno a simanekwa koyendji. Corry okwa thigako oyana yaali, yina oshowo aamwayina.
Oshituthi shokumudhimbuluka otashi ningwa nena mongeleka ya Holy Redeemer Parish moRoman Catholic moKatutura potundi 18:00 omanga efumbiko lye tali ka ningilwa mofaalama yaakwanezimo moKhorixas mOlyomakaya.
FESTUS NAKATANA