Namibia – ngashi Zambia naDemocratic Republic of Congo – okuli a pewa enkunkililo omolwa etukuko lyomukithi gwoyellow fever ngoka gwa lopotwa moAngola, na opena ompito gu taandele miilongo yopuushiinda.
Ominista yUundjolowele nOnkalonawa, Bernard Haufiku okwa koleke kutya Namibia ota longo kehe shoka ta vulu opo a gamene aakwashigwana ye okuza komukithi ngoka, gwa lopotwa tango mOshilandopangelo shaAngola, Luanda na okwa popiwa kutya ogwiihanena miitopolwa yopopepi noongamba dhaNamibia.
Okwa popi kutya AaNamibia mboka taya talelepo Angola otaya tuntilwa pomainda gomatuntilo ngoka ga ningwa puupitilo woongamba dhiilongo mbika.
Oshipotha shotango shomukithi ngoka osha lopotwa lwotango muDesemba moAngola omvula yapiti.
Iipotha ya thika po-1 500 oshowo omaso 230 oga lopotwa okuya pehulilo lyomwedhi gwa piti.
Kwiikwatelelwa kehangano lyoWorld Health Organisation (WHO) etukuko ndyoka olimwe enene muule woomvula 30.
Omukomeho gwoWHO, Margaret Chan okwa talelepo Luanda oshiwike sha piti, kehiyo ndyoka lya ningwa komalelo gaAngola, opo a konaakone oonkambadhala dhoka tadhi ningwa kepangelo mokukondjitha omukithi ngoka.
Okwa li pamwe nOmukomeho gwoWHO muAfrika, Matshidiso Moeti.
Angola okuli shimwe shomiilonga 34 muAfrika moka hamu lopotwa omukithi ngoka.
Omukithi ngoka ohagu taandelithwa koomwe nomadhidhiliko omwa kwatelwa uuwehame womutse, oshivu, uuwehame woomoontumba, okukala wahena oonkondo nonkungo.
Etata lyaamboka ya kwatwa komukithi ngoka ihe inaya pangwa ohaya hulitha muule womasiku 10 okuya 14.
Epangelo lyaAngola olya lelepeke omasiku noowili dhiilonga momandiki guundjolowele moshilongo noshikonga oshinene shomatuntilo shoka sha ningwa osha pewa koopresenda 89 dhaakalimo moLuanda.
Epangelo lyaAngola olya ningi omauvaneko kutya otali ka hulithapo omukithi ngoka okuya omwedhi twa taalela.
Lyopokati mpoka okwa hololwa kutya omukithi ngoka otagu yi moshipala omalanditho pokati kaAngola naDRC sho omalelo gaDRC taga indike aahingi yomaloli gaAngola ya taaguluke oongamba kakele ngele oye na oonzapo tadhi ulike kutya oya tuntulwa.
Iipotha ine yomukithi gwoyellow fever oya lopotwa moBeijing shaChina, omwedhi gwa piti. Kwiikwatelelwa koshikundaneki shaShanghai Daily, oonaku monika omukithi ngoka ayehe oya li ya talelepo Angola.
PLACIDO HILUKILWA