Moshipopiwa she shoka aningi, Omuleli gwaNamibia Hage Geingob okwa tseyitha oshiyetwapo shoompangela dhe tashi ithanwa Harambee Prosperity Plan ihe ina gandja nkene taku ka tulwa miilonga oompangela dhe dhoka.
Okwa lombwele oshigwana kutya oya ninga omakonaakono opo ku kale kwa hulithwapo oluhepo okuya mo-2025.
Oompangela adhihe odha manithwa na okwa tegelelwa dhi ka tulwe poshitaafula mEgumbo lyOmutumba gwoPashigwana pahapu dhomupresidende.
Okwa popi kutya ombaanga yiikulya ndjoka kwa tegelelwa yi tulwe miilonga otayi ka kwatelwa komeho kaanyasha mboka kaayena iilonga na otaya ka pewa olupandu onga ondjambi yawo. Aanyasha otaya ka pewa oshinakugwanithwa shokutothamo aanamagumbo naantu mboka ya pumbwa omakwatho goondya, otaya ka kaleka omapandaanda ga yela nokudheulilwa omadheulo gopetameko gopolisi yomoshigwana
Geingob okwa popi kutya epangelo lye otali lalakanene okuhulitha po ondjala oshowo okugandja omalukalwa omahwepo kaakwashigwana, elongo nonkalo yuundjolowele.
Kombinga yokugandja omalukalwa omuleli okwa popi kutya itaku ka tungwa owala uundjugo wa thika po-50 000 ihe otaku ka tungwa woomagumbo gaakwashigwana ga thika po-20 000 oshowo otaku ka wapalekwa omahala gokutunga omagumbo ga thika po-26 000.
Iishoshela ya gwedhwappo tayi ithanwa Solidarity tax nayo okwa tegelelwa yi ka tulwe miilonga.
Iishoshela mbyoka oya nyanwa koyendji moshilongo mboka ya ningile omapulaapulo gelongitho lyiimaliwa.
Omuleli okwa popi kutya iishoshela mbyoka otayi ka kala owala oshinakugwanithwa shaamboka haya mono iiyemo yili pombanda ihe okwa tumbula kondandalunde pakugandja oshiholelwa kutya ngaashi andola mboka haya mono iiyemo yooN$78 000 komvula inaya kwatelwamo.
Moonkambadhala dhokushunitha pevi omaso gaanona naakiintu pethimbo taya pulumutha, ompangela yoHarambee okwa tegelelwa yi ka gandje omiti nokugandja omadheulo kaaniilonga yuundjolowele mboka taya ka topolelwa moshilongo.
Omahala gokutegelelea gaakiintu mboka yiihumbata nago okwa tegelelwa ga ka tungwe unene miitopolwa yomuushayi ngaashi Outapi, Rundu, Katima Mulilo noAussenkehr. Pakutsa unene omuthindo kaanyasha, Geingob okwa popi kutya iiputudhilo yopaungomba okwa tegelelwa yikaandjakanekwe moshilongo ashihe nomuyalu gwaadheulwa otagu ka kala okuza paadheulwa 15 000 komvula okuya kaadheulwa 25 000 mo-2020.
“Otatu ka gandja omakwatho nomadheulo oshowo oompito dhokwiidheula miilonga opo mboka taya manitha omadheulo gawo miiputudhilo yopaungomba ya wape okutota oongeshefa dhawo,” Geingob ta ti.
Omupresidende okwa popi woo kombinga yomaupyakadhi gamwe ga taalela oshigwana ngaashi ompumbwe yomeya pondingaandinga nOnooli yoshilongo ta ti, otaku ka tulwa miilonga ongundu tayi ka tala kekandulepo lyuupyakadhi mboka.
Ompumbwe yomalila gomashina gokolutenda nolusheno nayo oya talika.
OMUTOOLINKUNDANA GWOMENI
Category: