Ombelewa yOmupresidende oyiitulila oshimaliwa sha thika poomiliyona 80, shoka sha nuninwa aakwashigwana yomuhoko gwAayelele naantu mboka taya lumbu nomaulema ga yooloka.
Uuyelele mboka owa tseyithwa kOminista yIipambele yOmbelewa yOmupresidende, Frans Kapofi pethimbo a tseyitha mOmutumba gwoPashigwana, mEtitatu omutengenekwathaneko gwiimaliwa ngoka gwa pewa uuministeli we nuumvo. Kapofi okwa popi kutya omupresidende okwa pumbwa eyambidhidho onkene okwa pumbwa omayambidhidho ngoka ta pumbwa opo ku kwashilipalekwe kutya omakwatho ngoka oga gandjwa kwaamboka ye ga nuninwa.
“Omuleli gwetu oku na oshinakugwanthwa oshinene komapepe ge nokukwashilipaleka kutya kehe OmuNamibia okwa mona omakwatho nomayambidhidho ngoka taga pumbiwa,” Kapofi ta ti.
Kapofi okwa popi kutya oshi li oshinakugwanithwa shOmuNamibia kehe okugandja omayambidhidho kOmupresidende opo ku kandulwepo onkalo yokwaahena iilonga nokugandja omakwatho koshigwana. Oshimaliwa shoka shoomiliyona 80 osha nuninwa aakwashigwana yomuhoko gwAaayelele, Ovatue nOvatjimba oshowo aantu ayehe mboka taya lumbu nomaulema moshilongo. Oshinima oshinene okugandja woo omakwatho gopaiyemo kaailongi ya za momihoko moka opo ya vule okutsikila nomaailongo gawo gopombanda.
Aakwashigwana mboka oya tulululwa mevi lyaayehe nenge moofalama dhoka dha landwa po kepangelo. “Omuyalu omunene gwAayelele mboka ya kala momudhingoloko gwaShivelo oya tulululwa mofaalama yaOndera mOshitopolwa shaShikoto opo ya vule okukala nevi oshowo onkalamwenyo ohwepo,” Kapofi a tsikile.
Minista okwa tsikile kutya aakwashigwana Aayelele moGam oya pewa iikumbatha, omatalashe oshowo oondya.
Kapofi okwa popi kutya Ompango tayi ithanwa National Disability Council Act otayi talululwa.
“Aantu taya lumbu nomaulema oya pumbwa esiloshisho okuza moshigwana molwaashoka poompito odhindji ihaya vulu okwiikwathela yoyene. Onkene otatu pula aakwashigwana ya lombwele epangelo mpoka tapu adhika aakwshigwana mboka taya lumbu nomaulema opo ya vule okukwathelwa.”
JEMIMA BEUKES