Omupresidende Hage Geingob na tango okwa idhimbike oshinakugwanithwa she moshikumungu shetungo lyopaliamende ompe, ta popi kutya oshi li oshinakugwanithwa shiilyo yomutumba gwopaliamende okutokola ngele okwa pumbwa okutunga etungo ndyoka nenge inashi pumbiwa.
Geingob natango okwa popi woo eli ompinge nesimaneko lyiitungomwa yaGermany, ngaashi opaliamende ndjoka ya tseyika nedhina Tintenpalast (Ink Palace). OTintenpalast oya tungwa kuGermany pokati komvuila yo1912 no1913.
Meyamukulo lye lyepulo lya ningwa kOmuleli gwoSwanu
Usutuaije Maamberua pethimbo sho omupresidende a gandja oshipopiwa she shopashigwana, Geingob okwa popi kutya oompangela dhokutumba opaliamende ompe odha za nale, nomathaneko oga ningwa nale.
"Oshinima shoka osha tameke nale pethimbo omupopi nale Theo Gurirab e li omupopi mOmutumba gwoPaliamende noompangela odha ziminwa. Ngele owa itaala muudemokoli nena owa pumbwa iiputudhilo ngaashi Ompangu Onene moshilongo nEgumbo lyepangelo," Geingob ta ti.
"Omatungo ngoka aanona yetu taya panda moshilongo ogaaGermany. Omatungo ga Germany ogeli kehe pamwe , otwa hala okutunga omatungo getu yene ngoka tatu simaneke. Otwa hala opaliamedne yetu yi simanekwe. Konima yoomvula 26 opaliamende ndjika kayi shi yaSwapo nenge yoDTA ihe opaliamende yetweni, kayi shi yandje."
Iilyo yimwe momutumba gwopaliamende naakwashigwana yamwe oya popi ya manguluka yeli ompinge netumbo ndyoka tali ka pula iimaliwa yoshigwana ya thika pombiliyona 2.2.
Omupopi megumbo lyepangelo, Peter Katjavivi okwa li a popi kuyele kutya oompangela dhoka odha manithwa nale niilonga yetungo oyi li pokutamekithwa.
Okwa popi kutya opaliamedne ndjoka otayi longithwa ngashiingeyi onshona okuyeleka niilyo yopaliamende mbyoka ya gwedhelwa.
Sha landula omalunduluko ngoka ga ningwa mEkotampango lyoshilongo mo-2014, omuyalu gwiilyo yopaliamedne ogwa gwedhelwa okuza piilyo 72 okuya piilyo 104. Iilyo yo National Council nayo oya gwedhelwa okuza piilyo 26 okuya 42.
JEMIMA BEUKES