Olopota ndjoka oya holola kutya eteyo lyiilya nuumvo moNamibia otali kala pootona 75 300 naandyoka eyo pombanda noopresenda 11 okuyeleka nootona 67 800 dhoka dha tewa omvula ya piti ihe ndyoka naatango eshona noopresenda 35 nootona andola 115 500 dhoka dha halika muule woomvula ntano.
OCrop Prospects, Food Security and Drought Situation Report ndjoka opo owala ya pitithwa oya holola kutya onkalo yoondya moshilongo otayi yi pevi kehe ethimbo okuyeleka noomvula dha piti, naanamagumbo oyiikolelea owala okulanda iikulya moositola nenge mooprogramma dhepangelo dhoondya dhoshikukuta.
Nonando ongaaka egandjo lyiikulya yoshikukuta inali gwana okutala komuyalu gwaantu mboka yeli mompumbwe yoondya.
Aanamagumbo oya popi kutya iikulya yoshikukuta ohayi kwata ethimbo na ihayi pewa aantu ayehe ohayi pewa owala mboka ya talikako kutya oya pumbwa pomakwatho noonkondo.
Olopota ndjoka oya holola kutya nonuumvo aanamapya oya taalela eteyo lya nkundipala, ihe ehwepo ngaaka okutala komateyo gomimvo dha piti..
Eteyo lyomapungu mIitopolwa ngaashi Zambezi noKavango kOmuuzilo noKavango komUuninginino olya eulike omalunduluko omashona noopresenda mbali okuyeleka nomateyo gomvula ya piti, ndyoka lya li pootona 1 400 nonuumvo eteyo oli li pootona 1 500.
Nonando ongaaka omuyalu ngoka oguli pevi noopresenda 62 dhootona 3 800 dhoka dha pumbwa andola okulikolwa.
Eteyo lyomapungu ga faathana momapya ga nuninwa omalanditho nalyo olya ulike eyopombanda eshona noopresemba mbali dhoka dha kalelapo ootona 37 500 okuyeleka nootona 36 700 dhoka dha likolwa omvula ya piti nootona dhoka dha pumbiwa ano dha kalelapo oopresenda 35 odhili po-57 800.
Olopota oya tsikile kutya iilyawala oya ulike eshuno pevi noopresenda 68 shoka taku tengenekwa owala kutya otaku ka tewa ootona 1 400 omanga omvula ya piti eteyo lya li po-4 300.
Olopota ndjoka oya popi kutya ootona 158 100 dhiilya odha etwa moshilongo pokati kaMei naDecemba 2015.
Olopota oya gandja omagwedhelepo omolwa onkalo yoondya ndjoka tayi shuna pevi moshilongo opo ooprogramma dhoshikukuta okuza kepangelo dhi nkondopekwe miitopolwa ayihe. Oya gandja woo omagwedhelepo opo ooprogramma dhoka dhi lelepekwe nokukala ihadhi hulile we muMaalista moka hadhi hulile.
ELLANIE SMIT