Okukala mehala ndyoka shaheli pepitikilo otashi pula epangelo okupitila mUuministyeli wOmidhongoloko iimaliwa oyindji mbyoka hayi futwa omeya nolusheno ndoka talu longithwa oshali kaantu mboka.
MEtosha, uuministeli monena ohawu futu kehe omwehi oshimaliwa shooN$700 000 omolwa omayakulo ngoka.
Kwiikwatelelwa kOminista yOshikondo shOmidhingoloko nOmatalelepo, Pohamba Shifeta otashika kala oshiwanawa nokushunitha pevi elongitho lyiimaliwa mbyoka uuna aakwashigwana mboka ya kuthwa mo.
Shifeta okwa pula opo ayehe mboka hazi moshikunino shoka shiinamwenyo shaali pamulandu ya kuthwemo nenge ku ka longithwe oonkondo mokuya kuthamo.
Shifeta okwa lombwele oNamibian Sun nonando uupyakadhi mboka waantu haya zi momahala ngoka inashi pitikwa otawu adhika momahala konyala agehe giikunino yiinamwenyo, Etosha oli na uupyakadhi uunene omolwa oshimaliwa sha thika po-N$500 000 hashi futwa kehe omwedhi onga iifuta yolusheno.
"Iifuta mboka otayi etithwa kaantu mboka yeli mehala moka shaaheli paveta nuuna aantu mboka ya kuthwamo nena iifuta otayi ka shuna pevi," Shifeta ta ti.
Shifeta okwa popi kutya omuna aantu oyendji haya zi mEtosha kashi li pamulandu na oya etwa mo kaakwanezimo yawo mboka haya longo moshikunino shoka shiinamwenyo.
Shifeta okwa popi kutya moshikunino shoka omuna aaniilonga ya thika po-3000 taya kalele, ihe monena otashi vulika omuyalu ngoka gwa thika po-5000 omolwa aantu yamwe mboka ya ka kala owala noofamili dhawo dhoka hadhi longele moshikunino shoka.
Minista okwa popi kutya okwa gandja elombwelo opo aantu ayehe mboka haya zi moshikunino shoka shaaheli pamulandu ya thigepo ehala ndyoka okuya mEtine lyoshiwike shika.
MuJanuari sho ali atalelepo oshikunino shoka okwa adha mo iinima oyindji ngaashi eeto lyiingangamithi moshikunino, omashina noondingosho okutumbulapo owala yimwe.
Minista okwa popi kutya pethimbo ndyoka okwa lombwele aakomeho mehala ndyoka opo aantu mboka ya kale ya thigapo ehala ndyoka.
"Uupyakadhi owuli mpaka kutya oya kambadhala okuya moonkundathana naantu mboka ihe oya tindi. Inapu pumbwa okukala oonkundathana, shoka kashi li paveta na ihatu kundathana naantu mboka taya yono oompango, oompango odhi na okulandulwa."
Sho apulwa kutya omukundu ngoka otagu ka kandulwapo ngiini monakuyiwa, minista okwa popi kutya aaniilonga ayehe otaya ka pewa uukalata wokupita mehala ndyoka, na aahokanwa yawo owala naanona yawo taya ka pitikilwa mo okukala nayo mehala.
Okwa popi kutya uumbangi wondjokana otawu ka pulwa.
"Itamu pitikilwa oohonda, aamwayinamati naakwadhona mehala ndyoka."
Shifeta okwa ti aantu ayehe mboka yeli mo shaaheli pamulandu otaya ka kuthwamo nuuna ya shuna mo otaya ka tulwa miipandeko.
Minista okwa popi kutya oondingosho dhoka dha li dha tulwa mEtosha osha hanagulwapo.
ELLANIE SMIT