Mwene gwondingosho okwa popi kutya okwa kanitha oomiliyona dhontumba oshowo iinima yaakwanezimo lye, sho omulilo gwa hanagunga po ondingosho ye negumbo lye ongulohi yEtitano.
Omuli ngoka gwa hanagulapo omaliko gaAnna Samuel ogwe ya thiminike woo ya lale polweela kohi yomuti sho omulilo ngoka gwa hanagulapo egumbo nongeshefa ye mOkuryangava, pethimbo ndyoka okufu taku tameke.
Ofamili oya popi kutya oya mono aalumenhu yaali taya yi ontuku okuza pehala mpoka pwa tukuka omulilo ongulohi yEtitano konima yombashu hoka okanona kaSamuel koomvula ne kali ka lala.
Olopota otayi ti kutya otashi vulika omulilo ngoka gweetithwa kuupyakadhi wolusheno.
Ofamili oya popi kutya Samuel okwa lombwele opolisi kombinga yomafekelo ge kutya otashi vulika omulilo ngoka gwa tomekwa owina ihe inaku patululwa oshipotha.
Samuel okwa popi kutya ejukebox olya li tali dhana natango sho omulilo ngoka gwa tukuka .
"Iinima ayihe oya ya na otatu totulula paife," Samuel ta ti.
Aakwanezimo mboka oya popi kutya omulilo ogwa tameke lwopotundi onti:20:00 naantu ayehe oya fadhukapo nokuthiga iinima megumbo molwaashoka aniwa omulilo ogwa li omunene gwo ogwa li tagu endelele.
"Inatu uva nando omulilo tagu nika otwa uvu owala oshinima sha topa. Osha li tashi ulike kutya omulilo ogwa tameke inagu zililako na ogwa li omunene."
Ofamili otayi fekele kutya iinima mbyoka ya yonagulwa po oyongushu yooN$540 000, mwakwatelwa iikolitha, iimaliwa koomuna, iitungithi, omashina, oosinuka, ookila dhokutalaleka niikwawo oyindji.
"Ondi uvite nayi, onda kanitha oshindji. Onda tungu ehala ndika uule woomvula, okutameka mo-1993. Osha kutha ndje ethimbo okumona iinima ayihe. Onda longo nuudhiginini na onda kwata nawa iinima yandje."
Okugwedha kiinima yomongeshefa mbyoka ya kanitha, oombapila dhawo dhuumauthemba nadho odha kanene momulilo ngoka nofamili otayi pula aanamitimahenda ye ya pe omayambidhidho.
Omuntu gumwe okwa mono epango sho a fudhilemo olwidhi omanga mukwawo a pangwa omolwa iilalo yomulilo iishona. Ayehe oya lalekwa mo moshipangelo.
Okanona koomvula ne hoka kali ka lala mondunda oka hupu moshiponga oshowo omulandithi gwomondingosho.
JANA-MARI SMITH
Category: