Onkalo ndjoka oya shuna kuuwanawa pahapu dhomunambelewa gwopolisi, Ilene Shapumba ngoka a popi kutya oye shi pondola okukalekapo ombili.
KOmufala gwOpolisi mOshitopolwa shErongo,
Festus Shilumbu okwa popitha aakwashigwana mboka na okwe ya lombwele kutya omaihumbato gawo kage li pampango na oya pumbwa okulandula omilandu dhomondjila uuna taya kongo evi.
"Tse otwa tulwa po opo tukalekepo ombili, alikana iyutheni komilandu dhoka dha tulwapo uuna tamu kongo evi."
Okwa popi kutya opolisi itayi ka pitika nando oombashu dhi dhingelwe pomahala ngoka taga kondjelwa kwaamboka yiikuthile evi.
Aanambelewa yopolisi oya hanagulapo oombashu dhoka dha dhengelwa kaakwashigwana mboka yiikuthile evi mehuliloshiwike.
Konyala aakwashigwana ya thika po-50 mboka ya tokola okwiikuthila evi, oya tindi okuza po pehala ndyoka.
Aakwashigwana ya 4 oya tulwa miipandeko mOlyomakaya konima sho osasiyona yOpolisi moTutaleni oshowo iihauto yopolisi ya dhengwa nomamanya kaakwashigwana, naamboka oya holoka komeho gomupanguli, John Sindano mOmpangulilo yaMbaye, taya tamanekelwa iipotha yeyonagulo lyomaliko.
Oonakutamanekwa oya tumbulwa komadhina kutya oWillem Shooya, Nukumbili Immanuel, Mulike Mulike naImmanuel Huseb noshipotha shawo osha undililwa komasiku gaali gaJuni na oya mangululwa modholongo sho ya pewa ekunkililo.
Omupopiliko gwaakwashigwana mboka ya kuthwa pehala mpoka tapu tungwa aniwa osasiyona yOpolisi, Olga Brisamus, okwa kaleke kokule ongundu yawo niikolokosha mbyoka ya holola molyomakaya.
"Tse otwa ya pehala lili olwaamba nOmbelewa yOshitopolwa poskola yOpevi yaTutaleni. Otandi pula iilyo yetu ayihe yiikaleke kokule nokwiikuthila evi. Tse otwa tegelela eyambukulo lyetu okuza kelelo."
Mayola gwaMbaye, Immanuel Wilfred okwali iipyakidhila niigongi na ina vula okutya sha kombinga yonkalo ndjika.
OTIS FINCK