Oshikondo shUundjolowele nOnkalonwa osha taalela ompumbwe yomiti dhilwe konima sho omahangano ngoka ga pewa otendela yokulanda omiti dhoka inaga vula okulanda omiti sigo uuna epangelo lya gwedhele omuyalu gwiimaliwa mbyoka hali gandja komahangano ngoka.
Omupopiliko gwoshikondo shoka, Ester Paulus okwa popi ngaaka ta yamukula koshinyolwa shimwe sha nyanyangithwa koshikundaneki shomoshilongo kutya, iipangelo kayi na omiti dhokuhwepopaleka oHIV naapangwa yamwe otaya shunithwa komagumbo inaya pewa omiti.
"Itatu vulu okukundathana oshikumungu shika miikundaneki, ihe ope na omahangano omanene ngoka ga shangele uuministeli oombapila kutya omolwa onkalo yepingakanitho lyiimaliwa ngashiingeyi itaga vulu okulanda omiti dhimwe po kakele uuna uuministeli wa gwedha ko koshimaliwa," Paulus ta ti.
Ngashiingeyi uuministeli aniwa otawu yi moonkundathana nElelo lyOkugandja Ootendela opo ku talike kutya oshike tashi ningwa po.
"Omiti inadhi pwa mo ihe otatu ningi owala omalongekidho okukwashilipaleka kutya omiti dhoka otatu dhi mono ngiini , okupitila nando omo Global Fund omanga omukundu tagu kandulwa po."
Shoka osha landula etulo miilonga lyomilandu omipe okuza kEhangano lyUundjolowele mUuyuni ndyoka lya utha kutya kehe omuntu ta monika ombuto yoHIV na tameke epangelo meendelelo itaku talika we kooCD4 counts.
MuJanuari Ominista yUundjolowele, Bernard Haufiku oya pula opo ku totwepo endiki lyokulonga omiti moshilongo, molwaashoka egandjo lyootendela komahangano yokulanda omiti ohali kateke eeto lyomiti pethimbo.
Mongashiingeyi Namibia okwa ninga eindilo lyokulanda omiti dhoARV dhongushu yoomiliyona 64 okuza kehangano lyaUganda lyedhina s Cipla Quality Chemical naHaufiku okwa li a nyana muNovemba gwomvula ya piti ondilo yomiti dhoka.
"Otatu landa omiti dhoka kondilo noonkondo okuyeleka niilongo yimwe po moSADC omolwa okulongitha onkalo yomupokati melando lyetu."
Minista okwa pula andola epangelo li kuthepo omukalo ngoka opo owala omiti dhi landwe kombiliha.
AaNamibia ya thika po- 104 531 otaya lumbu nombuto yoHIV na oyeli kepangelo. Okutameka mo-1996 omaso ogendji moshilongo oga kala taga kwatakanithwa noHIV.
JEMIMA BEUKES