Ompumbwe yaaniilonga mOshikondo shUundjolowele otayi nayipala kehe ethimbo sho ngashiingeyi aapangi mboka kwa talikako kutya oya pyokoka taya dhigipo iipangelo yepangelo mOvenduka nokukalongela oshipangelo shopaumwene shedhina Lady Pohamba Private Hospital (LPPH).
Namibian Sun oyi uvite kutya aapangi ya thika pomulongo otaya thigipo oshipangelo shaKatutura kehe omwedhi naapangi ya thika po-20 mboka ya pyokoka oya thigipo oshipangelo shoka muJanuari.
Oshipangelo shoLady Pohamba Private Hospital osha patulula omiyelo muJanuari gwonuumvo.
Kwiikwatelela komupangi gumwe ngoka a popi ina hala uukwatya we wuhololwe, okwa popi kutya aapangi otaya thigipo oshikondo omolwa oondjambi dhili pevi niilonga oyindji noonkondo. Oshinima oshikwawo osho kutya olutayima ihalu futwa we muuministeli mboka.
“Mbuka uupika. Ngele owa kalekwa pondje yiilonga kundohotola nena ino pitikwa okuya mefudho uule woomwedhi mbali nenge wu lelepeke oowili dhoye dhiilonga,” omupangi ngoka ta ti.
Okwa popi kutya ewalanda lyo2A mOshipangelo shaKatutura oli li lya nika oshiponga molwaashoka omupangi gumwe oku na okukwathela aapangwa ya thika po-50 molwaashoka epangelo inali hala okufuta olutayima.
“Ethimbo limwe oto iyadha wu na aapangwa yaali mboka ya pumbwa ekwatho meendelelo, nena oto tokola ngiini kutya oguni na se molwaashoka ito vulu okuya pa ekwatho nokuya tula komashina ethimbo limwe.”
Omupangi ngoka a tameke iilonga ye mepangelo okwa popi kutya haapangi ayehe taya hahwamekwa kiimaliwa nayamwe otaya longo nonando kape na omalutayima omolwa ohole yoshigwana komutima.
Ominista yUundjolowele Bernhard Haufiku okwa popi kutya ke na unene shoka ta vulu okuninga omolwa aapangi mboka taya thigipo oshikondo.
Okwa popi kutya omiyelo dhe odheegulukila aapangi mboka ye wete kutya otaya futwa kashona nenge oye na iilonga oyindji ihe oshimaliwa shoobiliyona 7.2 shoka sha pewa oshikondoshoka inashi gwana okukandulapo omaupyakadhi agehe pethimbo limwe.
Okwa ekelehi omapopyo kutya iifuta yolutayima inayi pitikwa, ta popi kutya otaya popi olutayima ndoka aantu haya longekidha kuyoyene.
Pahapu dhe, uuministeli owa longitha oshimaliwa shoomiliyona 55 mokufuta omalutayi momvula yimwe
Okwa popi kutya uuministeli owu na aapangi ya thika pe-1000 mboka taya dheulwa na otaya ka thitika omwaka ngoka gwa thigwapo kwaamboka yiikutha miilonga.
Omukomeho gwapangi moLPPH, Hannelie Botha, okwa koleke kutya oshipangelo osha kuta aapangi okuza miipangelo yepangelo, miipangelo yopaumwene meni nopondje yoshilongo.
JEMIMA BEUKES
Category: