Omumbisofi Mathaniel Ndaxuma Nakwatumbah, okwa hulitha omwedhi gwa piti moshipangelo mOvenduka konima owala yoomwedhi hamano sho a yi moshipundi shevululuko onga Omukomeho gwOngerki yoAnglican Diocese of Namibia na okwa fumbikwa mOdibo mOshitopolwa shaHangwena mOlyomakaya.
Aalilisa omayovi oya zi koombinga noombinga dhoshilongo oshowo pondje yoshilongo opo ya gandje esimaneko lyawo lya hugunina kolumentu ngoka alonga onga omulithi gwiimuna, omulongiskola, omukondjelimanguluko, omusita oshowo omusita moodholongo.
Nakusa Nakwatumbah okwa kutha ombinga mekondjelomanguluko nomo-2014 Omupresidende Hifikepunye Pohamba okwe mu pe epapa tali ithanwa 'The Most Distinguished Order of Namibia: First Class'.
Metumwalaka lye lyomahekeleko ndyoka lya leshwa pehala lye kOmuprima Saara Kuugongelwa-Amadhila, Omupresidende Hage Geingob okwa popi kutya, nakusa okwa kwatele komeho ongeleka yaAnglikan nohokwe na okwa lele pakugandja oshiholelwa , ombili nohole.
Geingob okwa popi kutya ongeleka yaAnglikan oyi na ondjokonona yekondjelo lyemanguluko lyoshilongo naNakwatumbah oku na mo onkandangala mondjokonona ndjoka.
Geingob okwa gandja omahekeleko komuselekadhi noyana yanakusa ta ti:"Omwa kanitha oshindji shi vulithe pomusamane naho yeni. Ne natse, atuheni otwa kanitha ependafule lyaNamibia."
ElongeloKalunga moSt Mary mOdibo olya ningwa kOmumbisofi gwOngeleka yaAnglikan moCape Town, Omundohotola Thabo Cecil Makgoba omanga Omupevi Prima Netumbo Nandi-Ndaitwah nOmusita Lukas Katenda ya kwatele komeho oshituthi.
Nakusa Nakwatumbah okwa valelwa mOmukunda Ohainengena mo-1945 nopethimbo ndyoka onga okanona okwa kala nokulitha iimuna yaakuluntu ye kohambo.
Okwa tameke oskola sho e na oomvula 15.
Okwa longa onga omulongiskola mOdibo pokati ko-1968 sigo 1971.
Okwa mono iilonga mOmpangulilo yaMangestrata gwaNdangwa uule woomvula ndatu omanga inaya a kiilongele uusita.
Okwa ningwa omundiyakoni mOvenduka mo-1976 nokonima yomvula yimwe okwa ningwa omusita moLesotho.
Nakusa okwa longa onga omusita mOvenduka, Ondangwa nOshomeya nokutameka mo-1991 sigo 2005 okwa kala omusita gwoodholongo moNamibia.
Okwa hogololwa nokuningwa omumbosofi mo-2005.
Omukulukadhi gwe gwotango Amelia okwa hulitha mo-2004 na okwa hokanununa mo-2006.
Okwa thigako aamwayinakadhona yatatu, omukulukadhi gwe Vistorina, aanona omulongo oshowo aatekulu.
PLACIDO HILUKILWA