Onga oonkambadhala dhokuya moshipala iiponga yomoondjila moondjila dhaNamibia oshilongo otashi ka tula miilonga mbala omulandu tagu ithanwa points penalty system ngoka gwa nuninwa aahingi mboka taya pogola oompango dhomoondjila.
Shika oshe ya polweela sho opolisi ya holola kutya uutekete wongushu yoomiliyona 1.9 owa pewa aahingi muule wehuliloshiwike ele lyapaasa ndyoka lya piti.
Omageelo ga thika po-785 oga gandjwa okuyeleka nomageelo 597 ngoka ga gandja omvula ya piti pethimbo lya faathana.
Omageelo ngoka oga gandja kaahingi mboka ya pogola ngaashi okuhinga kaye na omikanda dhokuhinga nenge omikanda dhokukala kopate nokuhinga ya longitha iikolitha.
Pahapu dhaMayola-Ndjai, James Tjivikua omainda gomoondjila ga thika po-18 oga ningwa niihauto ya thika po23 008 oya thikamekwa.
Aahingi ya thika po-1 524 oya konaakonwa mehuliloshiwike omanga aahingi ya thika po46 ya tulwa miipandeko omolwa okuhinga ya longitha iikolitha okuyeleka naahingi owala yatatu ya tulwa miipandeko omvula ya piti. Peinda lyondjila ndyoka lya ningwa poKaiti, aahingi 16 oya ningilwa omakonaakono muule woowili mbali no 11 oya monika kutya oya longitha iikolitha.
Tjivikua okwa popi kutya aahingi ya thika 240 oya pewa omageelo sho taya hingilile okuyeleka naahingi 225 mboka ya pewa omageelo moshinima sha faathana omvula ya piti.
Aahingi ya thika po-91 kaye na omikanda dhokuhinga omanga yaheyali ya adhika ya londeka ya pitilila.
Aantu 56 kaya li yiimangela mo momapaya omanga aahingi yahamanao yali taya popi moongodhi dhawo.
Aantu 76 kaye na omikanda dhokuhinga omanga aantu yaali ya geelwa sho taya hingi nayi.
Aantu 11 oya hulithila miiponga mehuliloshiwike okuyeleka naantu 21 omvula ya piti.
Tjivikua okwa ti aantu 113 oya ehamekwa okuyeleka naantu 121 omvula ya piti.
iiponga 64 oya lopotwa nuumvo okuyeleka niiponga 66 ya lopotwa omvula ya piti.
Ominista yIilonga nOmalweendo Alpheus !Naruseb, okwa pandula AaNamibia sho kwa dhidhilikwa eshuno pevi lyiiponga eshona ihe okwa kunkilile natango.
“Inatu pumbwa okuhulitha po omahwamwaheko nomahwahwameko ogendji tatu ningi oko ngaa kiiponga tayi shuna pevi,” Minista tati.
Amushanga ta kalele muuministeli , Peter Mwatile, okwa tseyitha kutya otaku ka tulwa miilonga omulandu gwopoints penalty system. Aahingi yontumba mboka taya ka pewa omageelo gomuyalu gwontumba otaya ka kuthwa omikanda dhawo dhokuhinga.
Okwa popi kutya aahingi ayehe otaya ka talika na oya ya moonkundathana nomahangano gomaloli opo ga ninge omahwahwameko kaahingi yawo.
ELLANIE SMIT