Omupeha Minista mOshikondo shEtalululo lyEvi, Clinton Swartbooi okwa popi kutya Oshikondo shOpolisi otashi longitha okatongo mokuyela iilyo moshikondo shoka.
Swartbooi okwa tsu omudhindo kutya ota kala nokupopya kombinga yonkalo ndjoka keena uumbanda washa.
Okwa popi ngaaka ta yamukula kominista yoshikondo shoka pethimbo ya popile omutengenekathaneko gwawo gwopashimaliwa gwonuumvo megumbo lyomutumba gwopashigwana.
Okwa popi kutya aantu mboka ye na ontseyo na oya longela oshikondo ihaya talika omanga yalwe taya yelwa molwaashoka oya za pomikunda dhimwe naanambelewa mboka aanene.
“Oyendji mboka ya longela oshikondo uule woomvula odhindji otaya iyadha poonkantu dhopevi omanga aantu yamwe aashona mboka opo owala ye ya ohela nokuya komadheulo konima yoomwedhi ndatu ota yelwa nale. Otashi uvitha nayi aantu mboka ya longela etanga ndyoka neitulemo nuulethimbo,” omupevi minista tati.
Swartbooi okwa pula woo omukalo ngoka hagu longithwa koshikondo shoka mokuyela aakiintu.
“Onda li nduuvu aanambelewa yopolisi taya popi kutya aakiintu inaya pumbwa okuyelwa molwaashoka ngele oya ningi omategelelo otaya ka ninga ngiini una ya yi momafudho gokupulumutha.”
Ominista yOpolisi Charles Namoloh okwa popi kutya oondjambi dhaanambelewa mboka ohadhi gandjwa kwiikwatelele kontseyo yawo.
Minista okwa popi kutya onkalo yopolotika oya etitha omaukundi nge tashiya komayelo metanga ndyoka.
Omahala gokukala
Lwopokati mpoka Ominista yEyambulepo lyOmikunda nOondoolopa, Sophia Shaningwa okwa popi kutya omagumbo gepangelo moka tamu lumbu aanambelewa yopolisi ogeli monkalo yanayipala. Okwa kunkilile uuministeli opo wu gandje omagumbo kaanambelewa mboka taya vulu okupangelitha ominino nando oga topa. Namoloh okwa zimine kutya omagumbo ngoka muna aapolisi ogeli monkalo ombwiinayi.
“Omahala agehe gokulongela nokulala. Otatu tala konkalo ndjoka okutameka omvula ya piti sigo omvula ndjika. Otwa patulula omahala omape ngoka twa tungitha,” Namoloh a yelitha.
Okwa popi kutya uuministeli we otawu ka longitha iimaliwa mbyoka wa pewa nonando inayi gwana mokuyambulapo nokuwapaleka omahala gokukala aapolisi ngoka ge na aantu oyendji noonkondo.
Nonando oshikondo inashi nunina oshitopolwa shomiimaliwa mbyoka sha pewa komatungo gomalukalwa gaapolisi, oshiikalekela oshimaliwa shoomiliyona 640 sha nuninwa oprogram yegameno moondjeedhililo nezulo.
Oprograma ndjoka oya nuninwa okukaleka monkalo ombwaanawa noyopauntu oondjeedhililo.
JEMIMA BEUKES