Omuniilonga gwomofaalama mOshikandjo shaAranos okwa monika ondjo moshipotha shedhipago lyohonda ye omimvo ne dha piti.
Omupaguli mOmpangu yoPombanda Dinnah Usiku okwa mono, Paulus Shilongo ondjo sho a dhipaga Dinna Eises sho emu dhenge nemanya iikando yontumba momutse.
Eises okwa dhengwa nongola. Iikulumuna mbyoka oya longwa momasiku 8 nenge 9 gaNovemba mo-2012 mofaalama yedhina Tredgold.
Emoniko lyondjo yaShilongo olya leshwa kwiikwatelelwa pamwe nOmpango yOkukondjitha Omiyonena dhOmomagumbo. Pethimbo lyeso lye, Eises okwa li ha zi pamwe naShilongo. Shilongo okwa tindi okuzimina ondjo moshipotha shoka ta ti kutya kali e na elalakano lyokudhipaga Eises. Okwa zimine kutya oye a etitha eso lye.
Osha monika mo kutya Shilongo okwa dhenge Eises nemanya meho nasho ashuna monima okwe mu dhenge ishewe mombamba yoshipala nemanya sha etitha opo iidhenge pevi.
Kwiikwatelelwa komupanguli, Shilongo okwa mona nale kutya okwa monitha Eises oshiponga na otazi ombinzi piilalo mbyoka e mu ningi sho emu dhenge nemanya ihe natango okwa kutha ongola nokumudhenga.
"Ongola ndjoka oya kala hayi longithwa kiinamwenyo na otashi ulike kutya oya nika oshiponga," Usiku ta ti.
Omakonaakono oga mono kutya Eises okwa ehamekwa momutse, moondjamama, othingo ya teka, iilalo kolutu oshowo oshilalo oshinene moshipala.
"Uuwehame mboka otawu ulike oonkondo dhoka dha longithwa niinima mbyoka ya longithwa mokweetitha omauyehame ngoka munakusa."
FRED GOEIEMAN