Aakiintu yaali mboka taya tsikile omailongo gawo nendiki lyoNational Health Training Centre oya thiminikwa koshiputudhilo shoka opo kaya shange ekonakono molwaashoka oyeli momategelelo.
Etokolo ndyoka olya geyitha aahwahwameki yuuthikepamwe mboka ya popi kutya omulandu ngoka goshiputudhilo shoka kagu li pauyuuki na otagu tongola.
Aakiintu mboka taya ilongele uupharmacist’s assistance, oya manitha nawa omvula yawo omumvo gwa piti na oya li taya shanga ekonaakono lyawo lyahugunina, sho ya kuthwa mo moshinyanga shokushangela ekonaakono mEtine lyoshiwike sha piti.
Mboka yaali okwali kwa tegelelwa ya ka tameke iilonga miipangelo yepangelo muMei gwomvula tuli.
"Oshimbuluma shetu shoka twa longo osho twa ningi omategeleleo. Otwa mana nale okushanga omakonaakono ga thika pugatano nokuninga omaidheulo getu miipangelo shaTsumeb naLiindili uule wiiwike ihamano inatu faula. Shika otashi uvitha nayi unene sho aakwanezimo yetu ya tala owala mutse okuya pa omakwatho," gumwe gwomaakiintu mboka ta popi.
Konima sho yiindikwa okushanga ekonaakono oya ningi eindilo nelelo lyoshiputudhilo opo ya pitikwe ya shange ekonaakono lyawo lya hugunina. Oya ningi ekwatathano nAmushanga ta kalelele mOshikondo shUundjolowele, Andreas Mwoombola.
Aakiintu mboka oya popi kutya Mwoombola okwa zimine pamwe noshiputudhilo opo ya galuke mo-2018 ya vule okumanitha eilongo lyawo.
"Oshike sha holoka kohenda? Otashi vulika tu kale tu na omategelelo ihe otushi shi kutya Namibia oku na ompumbwe yopharmacists na otwa hala owala okukwathela oshilongo shetu nokuyambidhidha oofamili dhetu. Okwaahena iilonga oto ku kandulapo ngiini ngele oto tumu komagumbo aakiintu mboka ya pyakudhukwa okulonga nokumona elongo,nokuya tidhila momapandanda. Oya hala tu kale momagumbo nokuha ninga sha sigo o-2018," omukiintu gumwe a popi.
Aakiintu mboka ya za mOhangwena nEtate mOnooli, yoomvula 25 no23 oya popi kutya aavali yawo ihaya longo na oya tala owala muyo opo ya manithe omailongo gawo yo ya vule okukwathela aamwayina.
Namibia Sun okwa mona ombapila tayi yelitha kombinga yomategelelelo miiputudhilo yuundjolowele moshilongo.
Ombapila ndjoka oya popi kutya aakiintu mboka ya ningi omategelele otaya ka pewa uulethimbo opo ya pulumuthe yo ya vule okwiipyakidhila niikumungu yina sha nepulumutho. Aakiintu mboka otaya ka pitikwa owala ya tsikile nomailongo gawo uuna uunona wawo wa gwanitha oomvula yimwe.
Omuhwahwameki guukashike kookantu, Immaculate Mogotsi okwa holola kutya omulandu ngoka otagu tongola aakiintu.
Rosa Namises naye okwa popi kutya omulandu ngoka otagu tongola aakiintu nekutho lyaakiintu mboka uuthemba wawo ya manithe ekonaakono lyawo ogwe ya yeke onkalamwenyo lyawo yeilongo.
"Uuministeli owu na nale ompumbwe yaapangi noopharmacists na otawu longitha aaniilonga mboka yeli nale miipundi yevululuko omanga tawu indike aanyasha mboka ya pyakudhukwa okwiilonga nokulonga ompito. Aalumentu mboka ya gandja omategeleleo ohaya ningwa ngiini? Ndishi ohaya pitikwa ya shange omakonaakono gawo," Namises ta ti.
Namises okwa popi kutya okwa hala uuministeli wiidhopemo opo ku gandjwe ompito kaakiintu mboka ya shange ekonaakono lyawo.
Amushanga takalele Mwoombola okwa pula omapulo opo ga tumwe momushangwa omanga Ominista Bernard Haufiku a popi kutya ke na owino yoshiningwanima shoka molwaashoka okuli moKhorixas niilonga.
GORDON JOSEPH