Aantu yane mOmukunda Okaku kaNangula oya tulwa miipandeko kOpolisi yaShana sho a idhilile moshigunda shawo oondoongi dha thika po36 nokutetagula 8 dhomoondongi dhoka.
Mbali dhomoondoongi odha si omanga hamano dheehamekwa noonkondo sho taku fekelwa kutya odha tetagulwa nomakatana.
Aafekelwa mboka ya hololwa kutya aanamimvo 20, 22, 24 no- 45, oya zimine kopolisi kutya oyo ya tetagula oondongi naadhoka dha si oya kukutike onyama opo ye yilyepo.
Opolisi oya adha onyama yondoongi ya pya oshowo ndjoka ya kukutikwa mondunda yiipeleki na oya lombwelwa kutya gumwe gwomaashinda naye okwa pewa onyama.
Sho Namibian Sun ya thiki pehala mpoka, oondoongi 34 odhali koshigunda omanga hamano itadhi vulu okuthikama.
Aafekelwa oya lombwele opolisi kutya oya lulilwa koondongi dhoka tadhi hanagulapo epya lyawo lyomahangu ihe inaya vula okuulikila opolisi mpoka pwa yonagulwa.
Omukonaakono gwopolisi, Saima Paulus okwa lombwele Namibian Sun kutya ombelewa ye oya kala nokumona omanyenyeto okuza kaanamukunda kombinga yoshigunda shuudha oondongi dhimwe odha tetwa nomakatana.
Paulus okwa popi kutya nonando kakushiwike ooyene yiimuna mbyoka, iipotha yuulunga neyonagulo lyomaliko oshowo emonitho lyiimuna iihuna otayi patululilwa oonakutulwa miipandeko.
"Kaye na uuthemba wokutetagula omagulu goondoongi ngaka, itashi popilwa."
Aafekelwa oya falwa kopolisi yaShakati opo ya ka gandje omahokololo gawo.
Paulus okwa popi kutya oondoongi dhoka inadhi ehamekwa otadhi mangululwa na okwa pula ooyene yoondoongi mboka ye na oondongi dha kana momudhingoloko ngoka opo ya ninge ekwatathano nopolisi.
Petrus Shafa, ngoka e li kapatashu ka mwene gwomukunda Okaku kaNangula okwa popi kutya omatompelo ngoka taga gandjwa kaatamanekwa kage na oonkondo dha sha.
Okwa popi kutya kaye na uumbangi kutya oondoongi odha yonagula epya.
"Otaya fundju naya popye owala oshili kutya oshike ya tetele oondongi."
Omukiintu a za momukunda ngoka okwa lombwele oNamibian Sun kutya oondongi dhoka odha etwapo neloli molyomakaya.
KENYA KAMBOWE
Category: