Ekutho moshikondo shokuhinga otaxi aazaizai mboka kaye na omikanda dhokulongela moNamibia ndyoka tali ningwa kOpolisi yOshilando shaVenduka olya taambiwako nomaako gaali kehangano lyoNamibia Transport and Taxi Union (NTTU).
Omupopiliko gwOpolisi yoshilando okwa popi kutya oya tameke niilonga mbyoka iiwike iyali yapiti meyambidhidho lyaanambelewa yomatembu.
Omupresidende gwoNTTU, Werner Januarie okwa popi kutya ehangano lyawo olya yi mekwatatahano nOmukuluntu gwOpolisi yOshilando, Abraham Kanime opo ya vule oku gandja ekwatho mekuthemo lyaazaizai mboka.
Okwa popi kutya aahingi yootaxi mboka ya kala momutumba ngoka gwa ningwa mOlyomakaya oya popi kutya oya nyanyukwa sho opolisi ya katuka onkatu ndjoka.
“Ope na aazaizai oyendji mboka taya hingi ootaxi, omanga ompango ya indika aazaizai ya longe iilonga mbyoka tayi vulu okulongwa kAaNamibia,” Januarie ta ti.
Okwa popi woo kutya oshigwana nasho osha nyanyukwa mokumona opolisi tayi ka tukile onkatu oshikumungu shoka.
Aahingi yootaxi oye wete kutya opolisi itayi ka pondola sha ngele yo itaya gandja ekwatho.
Januarie okwa popi kutya omalelo naga katukile woo onkatu ooyene yootaxi mboka taya pitika aazaizai ya hinge ootaxi dhawo.
Okwa popi kutya ngashiingeyi opolisi ohayi gandja owala egeelo komuhingi ihe shoka kashi shi ekandulepo lyomukundu.
Ehalo lyehangano opo li kwathele opolisi, otali taambiwako kOpolisi yOshilando pahapu dhOmupopiliko gwOpolisi ndjoka, Cillie Auala.
Okwa ti shoka itashi kwathele owala mokumona aazaizai mboka taya longo kaye na omikanda ihe otashi kwathelewoo mokumona iimbuluma mbyoka tayi longwa kaahingi yootaxi.
“Etokolo okukuthamo aantu mboka olya etithwa omolwa omuyalu omunene gwaazaizai taya kutha ombinga miimbuluma yomiyeka kwahomatiwa, eteyo lyomagumbo nolundji ootaxi otadhi longithwa miimbuluma mbyoka,” Auala ta ti.
Okwa popi kutya aahingi yotaxi mboka yeli omakutsi nomeho gopolisi otaya vulu okukwathela mokuhulitha po iimbuluma.
Auala okwa lombwele oNamibian Sun kutya,iilonga yoshikonga shoka tashi ningwa kOpolisi yOshilando oya ningwa meendelo pamwe nOmpango yoImmigration Control Act meyambidhidho lyaanambelewa yOmatembu.
Nonando ongaaka okwa popi kutya kashi shi oshili kutya AaNamibia oyo owala taya vulu okuhinga otaxi.
Okwa yelitha kutya ohaku ningwa omakonaakono uuna omuntu aningi eindilo lyokulongela moNamibia nokutala ngele iilonga mbyoka ahala otayi vulu okulongwa komuNamibia.
“Ihe moshikondo shootaxi kamu na ompumbwe yaaNamibia mboka ya hala okuhinga ootaxi. Aazaizai oyendji ohaya hingi ootaxi omanga kaye na omikanda dhokuhinga, onkene shoka taya ningi oshi li pondje yoveta.”
JANA-MARI SMITH
Category: