Oshikondo shOmakwatathano goPashigwana osha hala okugandja oshimaliwa sha thika poomiliyona 10 dhomiimaliwa ya thika poomiliyona 900 mbyoka ya pewa oshikondo shoka momumvo gwoshimaliwa gwonuumvo, koonkundathana pokati kepangelo naGermany dhi na sha neeto moshilongo iipongolo yaamboka ya ningi iihakanwa yomadhipago ga kiinahenda ngoka ga ningwa kaaNdowishi pethimbo lyookoloni moomvula dho-1904-1908.
Oohapu dha holoka kombinga nkene oshikumungu shoka tashi ungaungiwa nasho odha popiwa kOminista yoshikondo shoka mEgumbo lyOmutumba gwoPashigwana oshiwike sha piti.
“Konima nkene oPaliamende yaNamibia ya gandja oshikumungu shoka kepangelo, epangelo olya kala nokuya moonkundathana nepangelo lyaNdowishi oshowo omutumba gwoPaliamende yawo,” Nandi-Ndaitwah ta lombwele Omutumba gwoPashigwana.
Omvula ya piti omapangelo giilongo mbika iyali oga tsu kumwe opo ga hogolole aakalelipo yomapangelo moonkundathana dhoka nOmupresidende gwaNamibia Hage Geingob okwa ulike, Omundohotola Zed Ngavirue, onga omukalelipo gwaNamibia moshikumungu shoka.
Nandi-Ndaitwah okwa popi kutya okwa totwa woo Okomitiye yoPapolotika moshikumungu shoka ndjoka tayi kwatelwa komeho komunashipundi gwawo Omupevi Presidende, Nickey Iyambo.
Omapopyo gaNandi-Ndaitwah, kombinga yoshikumungu shoka oga landula omapopyo ga ningwa kOmukwaniilwa gwaaHerero, Vekuii Rukoro ngoka a popi kutya epangelo otali kambadhala okuya moshipala oonkundathana dhoka.
Okwa popi kutya kape na ngoka eshi shoka sha kala tashi kundathanwa kepangelo lyaandjetu nolyaGermany molwaashoka iikundathanwa ayihe oya kala ya holekwa.
Rukoro okwa popi ta yamukula kombapila ndjoka ya shangelwa epangelo lyaGermany komukalelipo gwaNamibia koGermany, Andreas Guibeb, ta pula opo oongundu dhompilameno moGermany dhi hulithepo oompata noonkundathana kombinga kutya Germany na gandje ombili kuNamibia omolwa omadhipago ngoka ga ningilwa AaHerero nAaNama pokati komvula yo1904-1908.
“Epangelo olya totopo oonkundthana okupitila mookomitiye dhoka ihe okabinete oka tokola okukaleka kokule noonkundathana dhoka aaleli yAaHerero nAaNama naashoka oshi li eyo pondje lyokatokolitho hoka ka tulwa iilonga kOmuiumba gwoPashigwana gwaNamibia momasiku 26 gaKotomba mo-2006,” Rukoro ta ti.
Guibeb konima okwa yelitha kombinga yombapila ndjoka a shanga kutya ongundu tayi lele moshilongo moka ihayi tula poshitaafula oonkundathana dheetwa po kongundu yompilameno.
Okwa ti, shoka tashi etitha opo oshinima shontumba shi kundathanwe uuna owala ngele ongundu tayi pangele moshilongo oyo ya tula poshitaafula oshikundathanwa shoka.
“Ondiinekela kutya oPaliamende yaGermany otayi ka tsa kumwe nokukundathana oshikumungu shomadhipago gakiinahenda ngoka ga ningilwa AaHerero, AaNama, Damara nAayelele nokusimaneka oshikumungu shoka momukalo ngoka sha pumbiwa okusimanekwa,” Guibeb ta ti.
GORDON JOSEPH