Oolopota dhoka dha pitithwa kiikundaneki kutya Namibia okwa taalela ompumbwe yolusheno odha ekelwahi kUuminista wIikwamina nIikwankondo oshowo Ehangano lyaNamPower oshiwike sha piti.
Obeth Mbuipaha Kandjoze, Ominista yIikwamina nIikwankondo okwa popi kutya oolopota dhoka dha ningwa kwiikwatelelwa kolopota yokomvula yaNamPower yomo-2014/2015 kadhi na uukwashili poshilongo oshi na olusheno lwa gwana pethimbo ndika.
Okwa popi kutya Namibia ota pumbwa okulongitha olusheno lwoonkondo dho 630 MW inamu kwatelwa omina ya Skorpion Zinc mine.
Kandjoze okwa zimine kutya olopota ndjoka oya li ya ningwa pethimbo mpoka kwa li kwatalika kutya otashi vulika oshilongo shi ye mompumbwe yolusheno ihe onkalo oya lunduluka ngashiingeyi.
Minista okwa popi kutya NamPower oha kutha oopresenda 40 dholusheno moshilongo okuza koRuacana hydropower plant, Van Eck coal-fired power station, Anixas diesel power station oshowo Omburu solar-power plant.
NamPower ota longo po natango onzo ye yokukutha olusheno yopakathimbo ndjoka tayi ka gandja olusheno lu li pokati kooMW 40-120.
Oopreseenda 60 dha hupako, NamPower oha kutha olusheno okuza koZESCO, ZPC naEskom.
Okwa nyana iikundaneki sho inayi kwashilipaleka tango omanga inayi pititha olopota ndjoka yali ya gandja kuNamPower, ta ti olopota dholudhi ndoka otadhi vulu okuguma oshilongo paliko.
Okwa popi kutya onkundana ndjoka oya gandja uumbanda inashi pumbiwa kombinga yonkalo yolusheno moNamibia.
JANA-MARI SMITH
Category: