Ehwahwameno lyoAffirmative Reposition (AR) otali kongo omikalo dhoka tadhi vulu okukandula po ompumbwe yomahala gokutunga omagumbo opo ku vule okwaadhika omalalako gomass urban land servicing program. Aakomeho yoAR , Job Amupanda, Dee Nauyoma noGeorge Kambala oya gandja uuyelele mOngwediva kombinga yiinyangadhalwa mboka yiipyakidhila nayo mehwahwameko ndyoka. Oya popi kutya oya kuutumba naakuthimbinga ya yooloka nokukundathana oshikumungu sheetepo lyomagumbo gondando tayi vulika kukehe oshowo iinyangadhala yokunkondopeka aanyasha.
Nauyoma okwa popi kutya, iiwike iyali ya piti ehwahwameko lyoAR olya kala omutumba nElelo lyOshilando shaVenduka na oya tsu kumwe megandjo lyooplota, etotepo lyomukunda gwanaskola yomiiputudhilo yopombanda, etotepo lyomandiki gegandjo lyomahala, etulo miilonga lyomulandu gwegandjo lyevi oshowo okukutha ko ofaalama dhoka tadhi hiilwa kondando yili pevi noonkondo.
Okwa popi kutya elelo lyoshilandopangelo olya pula oAR opo yi gandje iiyetwapo mbyoka kElelo na okwa popi kutya otaye ke shi ninga muule wethimbo efupi.
“AR oya pewa oshinakugwanithwa opo yi fale iikumungu mbyoka kElelo lyOshilando shaVenduka opo ku vulwe kutulwe miilonga iikumungu mbyoka. Shoka otashi ka ningwa muule wethimbo efupi,” Nauyoma ta ti.
Amupanda okwa gwedhapo kutya AR okwa ningi iigongi nOmuprima, Saara Kuugongelwa-Amadhila, omugandjimayele gwopaliko komupresidende, John Steytler, Omugandjimayele komupresidende kIipambele yAanyasha, Daisry Mathias, Omugandjimayele gwEkotampango kOmupresidende, Inge Zaamuani Kamwi, Elelo lyoNational Housing Enterprise (NHE) oshowo aakuthimbinga ayehe moshikumungu shevi.
Okwa popi kutya pethimbo lyoonkundathana dhoka dha ningwa iinima mbyoka ya kundathanwa ongaashi etulo miilonga lyolutu lyokukondolola ondando yomagumbo oshowo okukuthapo iinima mbyoka tayi enditha kashona oprogram yomass urban land servicing nokuninga oNHE onga ombaanga yomagumbo oshowo ekuthombinga lyaanyasha miikumungu yopaliko.
Amupanda okwa popi kutya iinima yilwe tayi uvitha nayi ongaashi aailongi yoomvula 17 mboka yeli koshi yekondololo lyaavali yawo ihe otaya hila omahala gokuza mOvenduka moka haya zi uuna taya yi kootundi dhawo.
“Ipula omunamimvo 17 ta hila? Ipula kutya otashi uvitha ngiini?” Amupanda ta pula.
Okwa popi kutya ewapaleko lyevi otali ka kutha ethimbo onkene iinima yindji oya pumbiwa okutalika opo ku vule okukandulwapo ompumbwe yevi moshilongo.
Kambala okwa popi kutya omutumba ngoka ya ningi nElelo lyOshilando shaVenduka oshikumungu shoofaalama tadhi hiila kondando yopevi noonkondo osha kundathanwa.
Elelo lyoshilando osha tseyithile oAR kutya olya tamekitha omakonaakono moshikumungu shoka nookondalaka dhoka itadhi ka lelepekwa.
Nonando ongaaka Kambala okwa popi kutya AR ota kongo okuya moonkundathana naamboka taya hiila oofalama omolwa ompumbwe yomahala gevi omolwa omuyalu omunene gwaakwashigwana moshilando, opo mboka taya hila ya gandje nokushunitha iitopolwa yilwe kumuni.
“Otatu kaya kaahiili ayehe, ye shi hala nenge inaye shi hala ota tu ya,” Kambala ta ti.
Amupanda okwa popi kutya kashi li mondjila omuntu gumwe ena evi lyuunene woohecta 20 dhoka dhi thike puupale wokatanga kokoompadhi wuli 20 na ota futu owala ooN$7 000 omanga aantu yalwe moshilongo taya futu ohiila yokomwedhi yooN$9 000.
KENYA KAMBOWE