Amushanga gwoNamibian Red Cross Society, Dorkas Kapembe-Haiduwa okwa tindi olopota kutya ehangano ndyoka olya ndopa okutopola iikulya mbyoka yali ya nuninwa aakwashigwana mboka taya pumbwa omakwatho goondya moshilongo niikulya mbyoka oya ningile nayi moombelewa onene dhengano mOvenduka.
Sho a yamukula koshinyolwa shoNamibian Sun, shomomasiku 27 gaAguste, Kapembe-Haiduwa okwa popi kutya Red Cross iha topolwa iikulya na oheshi ningi owala pethimbo lyoshikukuta okupitila mookombitha dhoosopa dhoka haya ningi pethimbo lyoshikukuta miitopolwa ya dhengwa koshikukuta.
“Red Cross iha topola iikulya. Otu na oompungulilo dha yooloka miitopolwa ya yooloka na ohatu longitha woo oompungulilo dhomahangano ga yooloka. Ka tu na nando oprogramma yimwe ndjoka hayi topola iikulya ohatu shi ningi owala pethimbo lyoshikukuta.”
Kapembe-Haiduwa okwa tsikile kutya ehangano lyawo ohali pungula owala iinima yilwe ihe kayi shi iikulya na okwa gwedha po kutya iikulya mbyoka hayi kala moompungulilo dhawo oombyoka owala ya gandjwa omagano na ohayi pewa aakwashigwana konima yiiwike iyali.
Sho a yamukula komapopyo kutya aagandji yooshali yIigwana yaEuropa oshowo yaBelgium oya hulitha po egandjo lyomakwatho kehangano, okwa popi kutya opo kutya omakwatho ngoka gali ga gandjwa kIigwana yaHangana ongoka goprogramma yomeya ga yogoka nuuyogoki ndjoka ya hulu muApilili mIitopolwa ngaashi Kunene, Ohangwena nOkavango.
Okwa popi kutya opoloyeka ndjoka oya manithwa niilonga otayi yelekwa noopresenda 80, na oya ningilwa omakonaakono kaayalulimambo giiyemo na keshi kutya oohapu dhoka odha zi peni.
Okwa ti, ope na oonkundathana dha manguluka dha nuninwa ooprogramma moNamibia, nehangano lyawo otali ka longela kumwe niilongo ngaashi Swedish, German, Belgium naSpan.
Iiyenditho
Kapembe-Haiduwa okwa ekelehi woo omapopyo kutya ope na iiyenditho mbyoka ya kankama owala poombelewa dhawo ta popi kutya iiyenditho owala iishona yi li pombelewa dhawo na otayi ka shunitha yi ka mane iilonga.
“Otu na iiyenditho oyindji yoopoloyeka dha yooloka. Opoloyeka yomeya nuuyogoki oya li onene sho yatameke mo-2007 na oya hulu muMei gwo-2011. Opoloyeka ndjoka unene mOshitopolwa shaKunene oyi na iiyenditho itano ihe opoloyeka ndjoka oyali ya andjanekwa kOshitopolwa shaKunene nOhangwena. Iiyenditho mbyoka oya za koopoloyeka dhoka dha manithwa. Monena otu na iiyenditho itano yathikama poombelewa dhetu.”
Laimi Dessa Onesmus
Kombinga yeuliko lyaLaimi Dessa Onesmus, onga omukomeho pwaahena ontseyo yolutu ndoka talu lele ehangano, Kapembe-Haiduwa okwa popi kutya kape na shoka shaningwa pondje yoveta.
“Kandi shi ngele uupyakadhi euliko lyaLaimi nenge opoloyeka. Laimi ota kwatele komeho uundjolowele,” Kapembe-Haiduwa ta ti.
“Belgium Red Cross okwa kala ta gandja omakwatho kopoloyeka yaanona mboka yeli mompumbwe na oya hulu mo-2013 konima yoomvula ndatu. Otwa li moonkundathana opo ya tsikile ihe ita tu tsu kumwe nomilandu dhawo dhimwe dhoka ya tulapo,” Kapembe-Haiduwa ta ti.
Okwa nyana omalundilo agehe ngoka na okwa popi kutya oshi li oshinakugwanithwa she okuulika aaniilonga na kasha shi oshinakugwanithwa shelelo lyehangano.
Okwa popi kutya ekalepo lyEhangano lyOmushigakano omutiligane moshilongo kehe otali kwatelwa komeho kOmpango yoPaliamende na okwa ti kehe oshilongo osha pumbwa ehangano lyiikalekelwa ngaashi oRed Cross opo ku vule okugandja omakwatho gopauntu kaakwashigwana.
Kapembe-Haiduwa okwa popi kutya omahangano gamwe oga hulitha po okugandja ooshali molwaashoka onkalo yaNamibia oya hwepopala na inayi talikako we ngele onkalo yopaulumomhumbwe.
OVENDUKA DORCAS MHUNGU NAKENYA KAMBOWE