Oya holola kutya omahala gawo oga metwa papuko sha etitha aakwashigwana yamwe ya futwe iimaliwa iishona noonkondo okuyelekanitha niitopolwa yawo yomavi mbyoka taya gandja po.
Omunangeshefa gumwe, Kleopas Kapweya okwa ningwa oshiholelwa.
Evi lyaKapweya olya metwa kutya olyuunene woometa 170.3 koometa 210, niifuta mbyoka a pewa oya gandjwa kwiikolelelwa kemeto ndyoka.
Kapweya sho a nyenyeta na okwa ka ninga omapulaapulo kuuminsiteli mOvenduka na osha monikamo kutya evi lye olyuunene woometa 290.3 koometa 491.5.
Hangame owala, aantu oyendji otaya nyenyeta, na oya kanitha einekelo maanambelewa yomEenhana. Monena otwa hala owala okulongela kumwe noombelewa oonene dhUuministeli wEyambulepo lyOondolopa nOmikunda. Omayalulo gawo ogeli mondjila,” Kapweya ta ti.
Aanamukunda mboka ya gumwa konkalo ndjoka oya shanga woo omukandanyenyeto gwawo, taya pula opo kukuthe po omunambelelwa gwomatulululo ngoka taya popi kutya kena omikalo na otaya pula woo opo omameto ngoka ga ningwa nale ga kuthwe oonkondo. Oya popi woo kutya omauvaneko giifundja oga pewa aakwashigwana mboka taya tulululwa . “Shoka twa lombwelwa miigongi hasho sha popiwa momatsokumwe ngoka twa shaina. Pethimbo lyiigongi otwa lombwelwa kaanambelelwa kutya ota tu ka pewa ooplota ndatu kehe gumwe popepi nomagumbo getu nale ihe otwa haluka molwaashoka omatsokumwe ngoka twa shaina otaga pula opo tu konge omahala galwe,” aakwashigwana ta popi.
Sylvanus Nangodji ngoka ta lumbu woo nuulema womeho okwa popi kutya okwa li a lombwelwa kutya otaka pewa oplota popepi negumbo lye, ihe nani oombapila dhoka a shaina otadhi pula a thigepo ehala ndyoka.
Mwene gwomukunda Festus Hamutoko, okwa nyenyeta kutya hangaashi ooyene yomikunda yamwe, mboka ya pewa iifuta molwaashoka oya kanitha omikunda dhawo ye ina pewa iifuta yasha.
“Sho aanambelewa ye ya okumeta omavi, ondeya yambidhidha na onda pulwa opo ndi shaine oombapila dhimwe dhoka tadhi holola uumwene wevi ihe sho aantu taya futwa ngame inandi monasha,” mwene gwomukunda ta ti.
Aakwashigwana mboka oya nyenyeta woo kutya aanambelewa mboka otaya longitha omilandu dhoka inadhi yela koshigwana.
Laivi Hamutoko okwa popi kutya omuntu keeshiwike okwa tulululwa pehala lye ihe sho a nyenyeta okwa gandwa komunambelewa gwedhina, Ruben Hashoongo, ngoka e mu lombwele kutya ye oku na uuthemba okutululula kehe ngoka a hala.
“Okwa lombwele ndje kutya ondi na okuthiga po ehala lyandje opo a tulepo omuntu ngoka molwaashoka ngame kandi na iimaliwa tayi vulu okutunga egumbo ewanawa,” Hamukoto ta ti.
Sho aningilwa omapulaapulo, Hashoongo okwa ekelehi omapopyo ngoka.
“Omungwelume ogwa ningi ehala lyolukalwa naantu yopaumwene kaye na uuthemba okuya pehala kehe li li meni lyoongamba dholukalwa ndoka naLaivi ehala ndyoka a hala oli li mokati kepandaanda.”
Hashoongo okwa popi kutya aakwashigwana mboka itaya longele kumwe otaya ningitha iinima iidhigu.
Okwa ti aakwashigwana otaye ya lundile kutya otaye ya yeke evi lyawo ihe yo aanambelewa owala taya gwanitha po iiilonga yawo.
Aakwashigwana mboka oya popi woo kutya aantu mboka unene haya talika momudhingoloko ngoka oomboka owala ya za pondje yomudhingoloko.
OMUNGWELUME PLACIDO HILUKILWA
Category: