Ehala ndyoka tali longele ehangano lyomatungo lyaKorea okwa lopotwa lya wapalekwa mEtitano sha landula oshinyolwa shoka sha holoka mOshifokundaneki shoNamibian Sun Etitano tuu ndyoka.
Oshinyolwa shoka osha popi kombinga yonkalo yanyata noonkondo tayi adhika pOkamba yaakwaita moSuiderhof mpoka tapu tungwa kehangano ndyoka lya za pondje yoshilongo.
Okwa lopotwa kutya iitopolwa yiinamwenyo, onyata dhaantu, ominino dhomeya gonyata otayi adhika popepi nehala mpoka hapu lala aaniilonga mboka.
Ehangano ndyoka tali tungu pokamba yaakwaita olya North Korea lyedhina
Mansudae Overseas Projects na otali tungu oombelelwa oonene dhUuministeli wEgameno.
Kuyelele mboka wa pewa oshifokundaneki shika lyopotundi 17:00 mEtitano. Konyala aalumentu 40 oya wapaleke ehala ndyoka tali adhika konima yoondunda dhokulala aaniilonga.
Omaloli ga thika pugaali oga monika pehala ndyoka lya wapalekwa sigo olyopotundi 23:00.
Oshiwike sha piti oNamibian Sun oya mono iitopolwa yomeni yiinamwenyo ngaashi omandjandja ya ekelwahi pehala ndyoka lyaakwashigwana. Omakaha goombwa, omitse dhoohi, ooniga dhookudu oshowo shoka kwa hololwa kutya ngiika okambishi kasa nenge okalimba oya monika pehala ndyoka. Pehala ndyoka opwa monika woo oonyata dhantu nomasipa. Okwa monika okakololo ke na uulimba nuumbishi owa monika tawu ende meni lyodhalate ndjoka.
Konima yoshinyolwa shoka, gumwe gwomoomenindjela dhopoloyeka ndjoka ngoka iitumbula kedhina kutya oChoi okwa talelepo oshikundaneki shoNamibian Sun na okwa popi kutya ke na ontseyo yasha kombinga yiitopolwa yiinamwenyo mbyoka tayi adhika pehala ndyoka na nkene ye ya pehala ndyoka.
Choi okwa popi kutya aaniilonga ye kaye na mo olunyala mehokololo ndyoka.
Choi okwa popile aaniilonga ye kutya okuya shi nawa na hayo ya ekelehi iitopolwa yiinamwenyo pehala ndyoka.
Okwa ekelehi omapopyo kutya ohaya yaka iitekulwanamwenyo yaantu opo yeke yi dhipagepo.
Okwa popi kutya ehala ndyoka oli li ehala lyaayehe na otashi vulika aantu yalwe oyo ya ekelehi iinima mbyoka pehala ndyoka.
Okwa zimine kutya omvula ya piti opwali oombwa dhili modhalate yawo naasho aakwahigwana ya nyenyeta kutya ohadhi kudhile unene odha kuthwa po ihe okwa popi kutya oombwa dhoka odha Ii dha nuninwa egameno owala.
Choi okwa zimine woo kutya ohaya tekula uulimba mboka haya li.
“Okulya uulimba oshi na uundjolowele ihe ihatu li oombwa,” Choi ta ti.
Okwa popi kutya ohaya ningilwa omakonaakono kehangano lyoWindhoek Consulting Engineers.
Herman van der Merwe gwoWindhoek Consulting Engineers okwa lombwele oNamibian Sun ita itaala kutya omathano ngoka oga thanekwa pehala ndyoka. Okwa popi kutya yo ohaya konaakona owala ehala lyiilonga ihe ihaya konaakona oondunda dhaaniilonga molwaashoka ngoka omahala gopaumwene.
Okwa gwedha po kutya ehangano ndyoka olya kunkililwa monakuziwa opo li kaleke ehala lyawo lya yela.
OSPCA naye okwa zimine kutya monakuziwa oya lopotelwa omanyenyeto goombwa pehala ndyoka noombwa dhoka odha li dha kuthwa po.
Van der Merwe okwa popi nomuthindo kutya ehangano ndyoka inali uthwa okukala niinamwenyo pehala ndyoka na okwa haluthwa konkalo kutya ope na nuulimba wa idhililwa pehala ndyoka ihe okwa undulile omapulaapulo agehe komudhaneki gwopoloyeka ndjoka Marley Tjitjo ngoka ina vula okumonika.
Elelo lyaVenduka oshowo Uuministeli wEgameno inawu yamukula natango komapulo ngoka ya tuminwa Etine lya piti.
OVENDUKA ELLANIE SMIT