Mosoondaha pethimbo lyElongeloKalunga mongeleka Grace Embassy Ministry, omukadhona gumwe okwa popi kutya omapando ge gomomutse oga kuthwamo momutse sho kwa hololwa aniwa kutya oku na oondemoni dha pitile moofufu ngoka a li a pandelwa.
Aavali yomukadhona ngoka oya ithana opolisi sho omukadhona ngoka a kala tiihumbata a fa omuntu a kwatwa kuunkundi wopamadhiladhilo.
‘Omuhunganeki’ Hilda Shiimi, 23, ngoka e li omusita gwongeleka ndjoka okwa popi kutya omukadhona ngoka okwa kala ta hiti OmalongeloKalunga mongeleka ndjoka uule woomwedhi ndatu dha piti. Pethimbo lyomalongeloKalunga ongeleka oya kala hayi galikanene iilyo yawo na kashi shi oshikando shotango omukadhona ngoka ta galikanenwa
“Omukadhona okwa kala nokuhita omalongeloKalunga mongeleka uule womwedhi ndatu dha piti na ka tu uviteko ko kutya oshike opolisi tayi ihumbata ngaaka twa fa otse ta tu pewa ombedhi. Tse ka tu na shoka twa ninga na otwa hala edhina lyongeleka yetu li yelekwe molwaashoka olopota ndjoka ya fala koNBC kayi na uukwashili,” Shiimi ta ti.
Pahapu dhaShiimi, mOosondaha odhindji okakadhona hoka oka pula opo ka galikanenwe molwaashoka oke wete aniwa ke na oondemoni.
“Otwa gongala opo tu mu galikanene ihe okwa tameke ta popi momalaka ga yooloka newi lye olya lunduluka tali ulike ongeyo sho twa tameke ta tu mu galikanene. Ewi lye olya popi kutya oha longele satana na okwa popi kutya okwe ya kongeleka opo a hanagulepo ongeleka nokudhipaga omuntu. Okwa popi kutya okwa za kohi yefuta na okwa pewa elombwelo opo a dhipage omuntu nuuna ineshi ninga nena ota kanitha omwenyo gwe. Otwa galikana na okwa lombwele ongeleka opo yi kuthemo omapando ge. Sho omapando twe ga kuthamo otwe mu omafufu ge ngoka a li a pandelwa ihe okwa tindi oku ga tambula. Konima yomagalikano okwa tameke tiihumbata tashi limbilike ta tondoka mongelaka ye ota dhenge aantu naashoka osha holoka sho oondemoni dha kuthwamo muye,” Shiimi ta ti.
Shiimi okwa popi kutya oya kaleke okakadhona hoka mongeleka ethimbo molwaashoka oye wete kutya ka kali taka vulu okuya momapandanda.
“Kali e li nawa okwa li tiihumbata tashi limbilike na ota popi iitya mbyoka ka tu uvite. Inatu pitika a ye kegumbo notaxi molwaashoka otashi vulika iiyehameke nenge pamwe a lyatwe koohauto. Otwe mu fala kegumbo nohauto ihe konima yomasiku okwa holoka omahokololo kutya otwe mu kondjitha opo a kuthemo omapando ge ihe shoka kasha shi oshili. Tse otwa kutha mo owala omapando ge ngaashi a pula ihe aavali ye oyo yemu kulula,’ Shiimi ta ti.
Omimvo dha piti okwa holola omahokololo miikundaneki kombinga yoongeleka moka aasita yoongeleka ya kwata koonkondo yiilyo yoongeleka yawo oshowo aasita mboka ya pula iilyo yawo yi lye omwidhi onga omukalo gwokunkondopela eitaalo lyawo naashoka osheeta omaipulo kombinga yoongeleka dhaapapudhuki.
Namibia ngaashi iilongo oyindji yaAfrika okuna oongeleka odhindji dhoka tadhi uvithako aakwashigwana kutya otadhi kandulapo omaupyakadhi moonkalamwenyo.
Iikundaneki yomoshilongo oya lopota omalupita nkene aakwashigwana taya tamaneke oongeleka dhoka.
Opolisi oya kunkilile aakwashigwana mboka taya yi moongeleka dhoka onga omukalo gwokwiiyambapaleka.
OVENDUKA - KAKUNAWE SHINANA
Category: