Omunambelewa gwopolisi e li moshipundi shevululuko mOshitopolwa shaHangwena okwa popi kutya ohonda ye nale oye mu etha na oya yi momashisha oshowo mepya na okwa ningi eyonagulo enene.
Omukiintu ngoka abtokola okuhulitha po ekwatathano lyawo nomunambelea ngoka nale okwa lopotwa a hwikepo iikutu yemwene na okwa yonagula omashisha gawo oshowo iilya mbyoka ya limwa nuumvo momukunda Okalyafengwa mOshikandjohogololo shaNgenga mOshitopolwa shaHangwena.
Abraham Leonard okwa popi kutya ekwatathano lye na Kandali Heita olya hulu pankatu ombwiinayi lela.
“Otwa kala nombili uule woomvula ndatu ihe uule womwedhi dha piti otwa kala nuupyakadhi. Okwa hala aluhe ndiitaale shoka ta popi na ina hala okuuvako omaiyuvo gandje,” Leonard ta ti.
Okwa popi kutya onkalo oya adha okwena kwa thita sho ya kala itaya vulu we okukala pamwe naHeita ngoka azile mOmuthiya mOshitopolwa shaShikoto na okwa tokola okushuna kaandjawo.
Okwa tameke ta pakele iinima ye ongulohi yOmaandaha.
“Onda li nda kumwa sho nda mono ta tema omulilo megumbo na okwa tameke ta hwike po iinima. Onde mu lombwele kutya shoka ta ningi osha nika oshiponga molwaashoka omulilo otagu vulu okutaandela nokuhwikapo egumbo ihe ina pulakena ndje.”
Leonard okwa popi kutya Heita okwa penduka lyopotundi 04:00 ongula yEtiyali na okwa yonagula omashina niilya oya tikile pevi, okwa dhipaga oondjuhwa na okwa yi mepya aka hahalepo iilya niikunwa ayihe.
Leonard okwa popi kutya uushadha mboka owa ningwa uule woowili dhontumba naashoka aashiinda pamwe namwene gwomukunda ye ya oya adha eyonagulo lya ningwa nale.
Simeon Jonas oye omushiinda gotango ngoka athiki po.
“Sho nda thiki mpaka lyopotundi 6:00 [Kandali] okwa li natango iipyakidhila nokuhahala po iilya mepya na kali ta pulakene komuntu,” Jonas ta ti.
Opolisi oya lombwelwa na oya thiki meendelelo ihe Leonard ina hala okutulamo oshipotha onkene eidhopomo lyopolisi olya li lyangambekwa naKandali okwa kwathelwa owala a pakele iinima ye yokuya.
Opolisi oye mu humbata po pamwe niinima ye na oye mu fala kehala hoka ta vulu okumonena olefa yokuya kOmuthiya.
“Shoka a ningi oluhindo. Okwa yonagula iinima mbyoka opo ndi mu gume kolutu ye a ka tulemo oshipotha ndi mwangwepo,’ Leonard ta ti.
Leonard ngoka e li omukondjelimanguluko na okwa wayimine etanga lyopolisi konima sho oshilongo sha manguluka okwa yi moshipundi shevululuko omvula ya piti.
Okwa popi kutya oya tsakanene naKandali omanga a li ta longele mOshakati na kaya li ya hokana pampango. Kandali ina vula okumonika opo a gandje ombinga ye yehokololo.
PLACIDO HILUKILWA