Mayola-Ndjai Desiderius Shilunga okwa popi kutya omapopyo kutya iihauto mbyoka oya landwa omvula ya piti ihe inayi longithwa sigo onena kage na uukwashili washa.
“Eeno, iihauto mbyoka oya paakikwa mpoka ohe inayi kalapo ethimbo ele,” Shilunga ta ti.
Okwa popi kutya iihauto mbyoka tayi adhika pokolindji ndjoka opo ya gandjwa na inayi etwa po ayihe oshita oya etwa po kooyimwe nooyimwe.
“Ihatu landa owala iihauto e ta tuyi nhukile, otu na omulandu ngoka hatu landula,” Shilunga a tsikile.
Okwa popi kutya omanga iihauto inayi topolwa, ohayi konaakonwa tango nokushangithwa
“Sho wu wete ya thikama mpoka oya tegelelwa oonomola dhawo dhi longwe.”
Shilunga okwa popi kutya molwaashoka omuyalu omunene gwiihauto ogwa thikama pokolindji ndjoka itashi ti kutya itayi longithwa.
“Ohatu landa iiyenditho shiikwatelela koompumbwe dhoka tu na.”
Okwa ningwa woo omapopyo kutya iihauto yimwe yopolisi ngaashi oombaki, uumbesa uushona nomaloli otayi mono iihuna komutenya molwaashoka oya kankamekwa owala momutenya pwaahena egameno lyasha.
Shilunga okwa popi kutya ina yakula natango olopota ndjoka tayi popi kombinga yiihauto ya yonagulwa niihauto mbyoka yi na omapuko ohayi shuna ko.
Omunambelewa gwopolisi e li moshipundi shevululuko, ngoka a popi ina hala uukwatya we hololwe, okwa lombwele oNamibian Sun kutya shoka osha kala omukalondjiigilile moka oshikondo shopolisi hashi ningi eindilo lyokulanda iihauto ndyoka hali vulu okuziminwa konima yomvula niihauto ohayi landwa pethimbo limwe oyindji, ihe nonando oongaka iihauto mbyoka ohayi vulu okukala nando uule woomvula ndatu inayi longithwa nomatayiyela ohaga kala ga yonuka molwaashoka iiyenditho ohayi kala ya thikama ethimbo ele momutenya.
Ina vula okukoleke ngele iihauto mbyoka tayi popiwa yi li pokondjili yaPatrik, oya landwa momukalo ngoka ihe okwa popi kutya oshinima sho kulanda iihauto oyindji poshikando kashi shi oshipe.
Shilunga okwa koleke kutya omvula ya piti oya landa iihauto oyindji ihe ina vula okuyeleka ngele iiyenditho mbyoka oya topolwa tuu.
Welma Enssle, ngoka ta longo pehala lyamushanga ta kalele mUuministeli wOpolisi okwa holola kutya iiyenditho ya thika lyopo-200 oya landelwa opolisi nonando ina gandja omuyalu gwothaatha.
Enssle okwa popi kutya ke na ontseyo kombinga yonkalo ndjoka yili po ihe okwa popi kutya Oshikondo shOpolisi oshi li nawa nge tashi ya kekondololo lyoopoloyeka dholudhi ndoka.
Enssle okwa popi kutya oku na ontseyo kutya oosasiyona dhimwe dhopolisi kadhi na iiyenditho ya gwana ihe okwa ti ke na ontseyo kombinga yiiyenditho mbyoka taku popi ya thikama pokolindji yaPatrik.
Okwa gwedhako kutya etopolo lyiihauto yopolisi ohali ningwa nuukeka opo ku kwashilipalekwe kutya kehe gumwe okwa mona oshiyenditho.
Komufala Andreas Nelumbo, ngoka eli omukomeho gwekondololo lyiiyenditho mOpolisi yaNamibia okwa popi kutya itaya vulu okuholola omuyalu gwiihauto mbyoka ya landa omolwa omatompelo gegameno.
JANA-MARI SMITH
Category: