Omumbisofi e li moshipundi shevululuko, Kleopas Dumeni okwa shanga embo li na omayeletumbulo.
Embo lyedhina ‘Notable Quotes by Bishop Kleopas Dumeni’, olya tulwa kumwe kuPetrus Angula Mbenzi, ngoka e li omupekaapeki na okwa longa pamwe nofamili yaDumeni uule wethimbo, opo ondjodhi yembo ndyoka yi tse.
Embo ndyoka olya tseyithilwa oshigwana komupresidende nale Sam Nujoma, ngoka a holola kutya okwa nyanyukwa sho omayele ngoka gaDumeni taga ka tseyika nokomapupi tage ya.
“Shoka shi li membo ndika kashi shi owala oonkambadhala dhoka dha ningwa ihe owino onene ndjoka tayi ulike eyambidhidho enene ndyoka lya ningwa kOmumbisofi nale Dumeni unene tuu meyambidhidho lye ndyoka a gandja koEvangelical Lutheran Church in Namibia (ELCIN) nokuyalwe,” Nujoma ta ti.
Mbenzi okwa popi kutya okwa nyanyukwa sho opoloyeka ndjoka ya pu na okwa holola woo ohokwe ye sho a li oshitopolwa shopoloyeka ndjoka.
Dumeni, ngoka a popitha aakali pethimbo lyembo lye sho lya tseyithwa na okwa popi melaka lye lyevalelwamo ano Oshiwambo, okwa pandula Mbenzi.
Embo ndyoka oli li melaka lyOshiwambo oshowo Oshiingilisa.
Oshituthi shoka osha kaliwa kOmunyekadhi gwaNamibia Monica Geingos, Omupilima Saara Kuugongelwa-Amadhila, Omupopi mEgumbo lyOmutumba gwoPashigwana Peter Katjavivi niilyo yoPaliamende.
KEITH VRIES
Category: