Opoloyeka ndjoka oya tulilwa miilonga mOndoolopa yaNgwediva.
Opoloyeka ndjoka ya tulwa miilonga lwotango kOmupresidende Hage Geingob nOminista yOpolisi Charles Namoloh muNovemba gwomvula ya piti na okwa tegelelwa yi hule momasiku ga 8 gaMei nuumvo.
Okomitiye tayi kwatele komeho opoloyeka ndjoka oya thikama po maanambelelwa yOpolisi, Etanga lyEgameno, Central Intelligence Agency, Namibian Correctional Services, Women and Men Network Crime Prevention Unit oshowo omalelo goondoolopa yaShakati, Ongwediva nOndangwa oshowo aakuthimbinga ayehe mboka ye na ohokwe yokukondjitha iimbuluma.
Oshiyetwapo shoka osha ningwa tashi wapaleke omahala ngoka ge na iihwa moka ku wetike kutya omo hamu holama oongangala.
Ngoloneya gwOshitopolwa shaShana Clemens Kashuupulwa okwa popi kutya opoloyeka ndjoka oya nuninwa okukondjitha iimbuluma nokuninga Namibia ehala lyagamenwa okuza kiimbuluma.
Kashuupulwa okwa pula aakuthimbinga ayehe, aanangeshefa nehangano lyaakiintu naalumentu mboka ya pyakudhukwa okukondjitha iimbuluma opo ya kwashilipaleke kutya iimbuluma oya kalekwa kokule nOshitopolwa shaShana.
“Opoloyeka ndjika inayi kala owala oshinima shOpolisi ihe nashi kale oshinakugwanithwa shomukwashigwana kehe,” Kashuupulwa ta ti.
Komanda gwOpolisi mOshitopolwa shaShana, Rauha Amwele okwa popi kutya ekandeko nekaleko lyiimbuluma kokule otali adhika owala uuna aantu ayehe taya kutha ombinga.
Amwele okwa popi kutya aantu inaya tegelela owala opolisi oyo yi kwatele komeho ihe nayo naya dhane onkandangala mokulwiha iimbuluma.
Mayola gwaNgwediva Angelina Angula okwa lombwele, aatoolinkundana kutya okwa nyanyukwa sho kwa tulwa miilonga oshiyetwapo shoka mOndoolopa yaNgwediva ndjoka yi na iihwa mbyoka yili omahala guuholameno goongangala.
Aanangeshefa oya gandja omagano giikunwa oshowo iipumbiwa yilwe kopoloyeka ndjoka.
KENYA KAMBOWE
Category: