Opolisi yaNamibia oyi li molukongo lwomulumentu omunamimvo 34, Charles Namiseb, ngoka iiyaka mondjeedhililo yaVenduka omwedhi gwa piti.
Namiseb ngoka ta tamanekelwa oshipotha shekwatonkonga pamwe naEdwin Tourob, 34, oya li taya pangulwa kOmpangu yoPombanda shi na ekwatathano noshiponokela nomuyeka ngoka gwa ningilwa aakokele moUis mOshitopolwa shErongo.
“Oongangala dhoka odha ponokele aakokele mboka yali itaya vulu okwiigamena pamwe nomaliko gawo,” Omupanguli Siboleka ta ti.
Moshiponokela shoka omulumentu omunamimvo 72 okwa dhengwa noshihupulo momutse na okwa mangwa, omanga omukulukadhi gwe omunamimvo 69 a dhengwa na okwa kwatwa onkonga na okwa mangelwa megumbo.
Oombudhi dhoka odha yeke aakokele mboka ohauto yawo, iimaliwa, oondjembo oshowo iikwamalyenge yongushu yooN$78 900.
Namiseb okwa monika ondjo momasiku 29 gaFebruali na okwa li e na okushuna kompangu mOmaandaha opo a ka pewe egeelo lye ihe konima sho a zi kompangu momasiku 29 gaFebruali aniwa okwa lombwele aanambelewa yOpolisi kutya okwa pewa omboloha na okwa yi.
Momukanda gwiikundaneki omupopiliko gwopolisi, Omupeha kOmufala Edwin Kanguatjivi okwa popi kutya opolisi otayi kongo omulumentu ngoka na otayi pula eyambidhidho lyoshigwana.
Charles Namiseb okwa za moUis ihe oku na woo aakwanezimo moSwakopmund, Walvis Bay nOtjiwarongo.
Kanguatjivi okwa kunkilile oshigwana opo kashi kambadhale oku mu tula miipandeko ihe nashi mu lopote kopolisi.
Omupolisi ngoka a mangulula Namiseb ota tamanekelwa oshipotha shokukwathela okwatwa yi ye ontuku.
Omunambelewa gwopolisi Festus Shihepo, 32, okwa holoka mompangu yaMangestrata gwaVenduka momasiku ga 4 gaMaalitsa na okwa pewa omboloha yooN$3 000 noshipotha she osha undulilwa komasiku 16 gaMei.
Kehe ngoka ena uuyelele kombinga yaampoka tapu adhika Namiseb na ninge ekwatathano naChief Inspector John Mwatongwe ko 064-219 044 nenge 081 246 1121, nenge osasiyona yopolisi yi li popepi
naye.
GORDON JOSEPH