Okwa tukuka oompata megumbo lyopashigwana oshiwike sha piti, moka ongundu yompilameno yopambelewa ya pula opo ku gandjwe omusholondondo gwiinakugwanithwa yaakulukadhi yomupresidende oshowo yomupeha gwe.
Oompata dhoka odha odha holoka pethimbo kwa tseyithwa Ontotwaveta yOondjambi nomauwanawa gOmupresidende moka omukulukadhi gwe ta pewa ondjambi yokomwedhi yi thike pwaandjoka yomupeha amushanga takalele.
Amushanga-Ndjai gwoDTA Elma Dienda okwa pulaapula ongushu nuunene wondjambi ndjoka.
"Oshike tashi ka nanwa kondjambi ndjoka? Iinakuganithwa yashike tayi pewa aahokanwa mboka? Otaya talwa omeho kulye sho taya futwa niimaliwa yoshigwana? Dienda a pula.
Okwa pula ngele aahokanwa mboka nayo otaya kala taya pewa omauwanawa gomalweendo uuna taya yi pamwe naasamane yawo momalweendo gopambelewa.
Omupresidende gwoDTA McHenry Venaani okwa popi kutya ke na uupyakadhi nondjambi yomupresidende tayi gwedhelwa ihe okwa pula kombinga yondjambi ndjoka tayi pewa aahokanwa yawo.
"Uuna tatu totopo oompito dhiilonga napu kale omulandu gwokutala kiilonga, po tapu kala woo omusholondondo gwiinakugwanithwa," Venaani ta ti.
Venaani okwa popi kutya Namibia okuna omuyalu gwaakwashigwana omushona onkene ina pumbwa omupeha presidende.
"Otwa kala nokutala onkalo twa mwena uule woomwedhi omulongo nambali."
Pahapu dhOminista yIipambele yOmbelewa yOmupresidende, Frans Kapofi okwa popi kutya aahokanwa yomupeha presidende otaya futwa molwaashoka otaya dhana onkandangala meyambidhidho lyomuntu ngoka e na oshinakugwanithwa shomupeha omuleli gwoshilongo.
"Otatu gandja mpaka kutya omupeha presidende na sile oshisho omukulukadhi gwe yemwene? Otwa mona kutya oshi li pauyuuki opo omuhokanwa gomupeha presidende a ningilwe uuwanawa," Kapofi tati.
Ontotwaveta ndjoka otayi utha opo omukulukadhi gwomupeha presidende nenge omusamane gwe ponkatu mpoka omupeha presidende omukiintu opo ya futwe ondjambi yokomwedhi yi dhike pamwe naandjoka yomupeha amushanga ta kalelele.
Ontowaveta tayi utha woo omukulukadhi nenge omusamane gwomupresidende a kale ta futwa kepangelo mwakwatelwa iifuta yopaunamiti yaahokanwa yawo pamwe noyana.
Omauwananwa ngoka otaga futwa koshigwana, okupitila miifuta yokomwedhi mbyoka hayi nanwa koondjambi dhaakwashigwana.
Caption
JEMIMA BEUKES