Yaali yomaatamanekwa yane mboka ya holoka komeho yOmpangu yaVenduka mOmaandaha taya tamanekelwa iipotha yokukala nooniga dhoompanda oyali nale pondje yomboloha.
Omufali gwiihokolola kOmpangu gwepangelo, Fillemon Nyau okwa lombwele ompangu kutya Kleopas Ahipala, 35, okwa li pondje yodholongo moshipotha shuukongo wompanda nale omanga Kaiko Murumbua, 27, a li pondje yodholongo moshipotha shekwatonkonga.
Yalwe, Vaino Ningeno Kalola, 22, naTangeni Pinehas Amunyela, 30, oya tulwa miipandeko kOpolisi mEtitano.
Oya tulilwa miipandeko moGreenwell Matongo moKatutura mOvenduka sho ya adhika nooniga dhoompanda. Sha landula omakonaakono Ashipala naMurumbua oya tulilwa miipandeko mOlyomakaya mOpuwo, pahapu dhOmupeha kOmufala Edwin Kanguatjivi sho a lombwele iikundaneki.
Pethimbo mboka ya holoka kompangu, omukalelipo gwepangelo moshipotha ano omufali gwiihokolola kompangu okwa popi kutya edhipago lyiinamwenyo mbyoka ya gamenwa opo ku kuthweko ooniga dhawo oshi li oshimbuluma oshinene na osha ha moNamibioa onkene okwa pataneke egandjo lyomboloha kwaamboka.
Opolisi oya pula woo opo aatamanekekwa ya ka thindikile aanambelewa yomakonaakono komahala giimbuluma mEtosha.
Kalola naMurumbua oya lombwele ompangu kutya otaya ka konga aakalelipo yawo yopaveta omanga Amunyela naAshipala ya holola kutya otaya ka ninga eindilo lyaakalelipo yopaveta.
Mangestrata Bernedine Kubersky okwa lombwele aatamanekwa kutya oya taalela epangulo enene moka tashi vulika yaka futithwe oshimaliwa shooN$200 000 nenge yaka pewe oomvula 20 modholongo.
Ina gandja omboloha kaatamanekwa ihe okwe ya lombwele kutya otaya vulu okuninga omaindilo gomboloha.
Oshipotha shoka osha undulilwa kesiku lyotango lyaJune.
FRANCOISE STEYNBERG
Category: