Elelo lyOongeleka moNamibia olya pula Uuministeli wIikwameni nOmatembu opo wu kundathane onkalo yoontauki mokamba yaDukwe moBotswana.
Ongongahangano yoongeleka oya tokola okukutha ombinga moonkundathana dhoka sha landula eindilo lyaningwa kongongahangano yOongeleka moBotswana.
Omupresidende gwOngongahangano yoongeleka moNamibia, Omusita Clem Marais, okwa popi kutya ehangano otali longekidha okuya moonkundathana nUuministeli wOmatembu.
Ongongahangano yOongeleka moBotswana oya lombwele mbushe miilonga gwaandjetu kutya oontauki dhoka otadhi pula ekuthombinga lyongongahangano yoongeleka moshilongo nokukundathana egameno lyoontauki.
Ominista yOmatembu Pendukeni iivula-Ithana oya li ya popi kutya oontauki dhoka odha taambwako okugalukila moshilongo. Ongongahangano yOongeleka yaNamibia oya holola kutya otayi kaya moonkundthana noshitayi shawo mOshitopolwa shaZambezi opo onkalo yoonkundathana yi vule okupula komeho.
Oonkundathana dhaNamibia naBotswana dhokugalulila kegumbo oontauki dhoka odha yi wa moshipala muJanuari sho ompangu moBotswana ya gandja ethimbo koontauki dhoka.
Oontauki dhoka odha kala tadhi lumbu mokamba yoontauki yaDukwe okutameka mo-1999 sha landula oshiponokela shuukulo sha ndopa shoka sha ningilwa Oshitopolwa shaCaprivi mo-1999.
Nonando oontauki odhindji odha galukile kegumbo dhimwe po inadhi galuka natango nuutile womahepeko, omanga dhimwe dha popi kutya dho kadhi shi AaNamibia ihe AaCaprivi.
Okamba ndjoka oyi na oontauki dha za miilonga ngaashi Angola, Namibia, Somalia, Zimbabwe naGreat Lakes.
MuJanuari oshikundaneki shaBotswana osha lopota kutya oontauki dhaNamibia dha thika po-928 dhoka dha li dhi na okugalukila kegumbo odha pewa natango uuthemba wokukala mokamba ndjoka wopakathimbo koLobatse High Court.
Oontauki dhoka odha li na okugalukila moshilongo muDesemba gwomvula ya piti, na omolwa uutile wokuningilwa omahepeko odha ningi eindilo lyomeendelelo kompangu yopombanda taya pataneke etokolo lyaBotswana okukutha oonkondo uukwatya wawo woontauki. Pethimbo ndyoka Iivula-Ithana okwa popi kutya etata lyoontauki dhoka odha galukile kegumbo na inadhi ningilwa omamonitho giihuna gasha ngoka taga popiwa ga tilika kwaamboka natango yeli moBotswana.
Minista okwa popi kutya mokati koontauki 3000 dhoka dhali dha yi moBotswana o-800 owala dha thigala moBotswana.
Pethimbo sho a li aningilwa oonkundathana koNamibian Sun omukwatheli omukomeho gwOontauki moBotswana Moses Mochabo okwa popi kutya oontauki otadhi ka galuka pahalo lyadho na okwa holola kutya oontauki dhimwe inadhi iholola onga AaNamibia.
GORDON JOSEPH