Omukomeho nale gwoNamibia Institute of Public Administration and Management (Nipam) Joseph Diescho,okwa popi kutya oshiputudhilo shoka osha pumbwa okukwatelwa komeho komuntu na uulongelwe woPhD.
Diescho okwa poppi ngaaka ta yamukula ketseyitho lyompito yiilonga ndjoka a tidhwa omvula ya piti.
Metseyitho ndyoka, uulongelwe woPhD inawu pulwa ihe owa popiwa owala kutya mboka ye na uulongelwe mboka oyo taya ka talika tango.
Iipumbiwa yimwe ongaashi uulongelwe wopublic administration and management, political science, sociology, leadership, change management, economic development, law, business management nenge oadministration.
Diescho oku na uulongelwe woomaster’s degrees ndatu oshowo uulongelwe woodoctorates mbali wa za kOshiputudhilo shoFort Hare University moSouth Africa oshowo Columbia University in New York City.
Omukomeho gwomakwatathano moUniversity of Namibia (Unam) Edwin Tjiramba oye ta longo pehala lyomukomeho gwoNipam.
Sho a pulwa kutya omolwashike ta popile kutya omuntu e na uulongelwe woPhD oye na lele oshiputudhilo shoka, Diescho okwa popi kutya okutula pevi iipumbiwa wonkatu ndjoka otashi ka gandja ompito kaanapolotika opo owala ya tule kehe gumwe ponkatu ndjoka nokuulika omuntu ita vulu okukwatela po nokuyambulapo oshiputudhilo shoka.
Diescho okwa popi kutya iiputudhilo yilwe muAfrika otayi lelwa kaantu ye na uulongelwe mboka nokutula pevi iipumbiwa mbyoka nena otashi tula moshiponga oshiputudhilo.
Okwa ti omuntu e na uulongelwe mboka ota gandja ongushu koshiputudhilo na ota vulu okudhilaadhila kuyemwene na otashi kala oshidhigu kuye a kwatweko kiikwapolotika.
Omunashipundi gwoNipam, George Simataa, okwa popi kutya iipumbiwa mbyoka oya tulwa po kolutu talu lele oshiputudhilo shoka na inayi ningilwa omanyenyeto nenge yi nyanwe.
Nipam oku na oshinakugwanithwa shokugandja omadheulo kaaniilonga yepangelo oshowo okuninga omapekaapeko.
GORDON JOSEPH