Omukomeho gwOpolisi yOshilando shaVenduka okwa popi kutya aakalimo yomoKatutura nomalukanda pondje yaVenduka noKhomasdal oyo unene ya ninga iihakanwa yiimbuluma.
Abraham Kanime okwa popi kombinga yooprogramma dhoka dha tulwa miilonga dha nuninwa okukondjitha iimbuluma. Oshilando shaVenduka osha topolwa miitopolwa 19 nelalakano lyokukondjitha iimbuluma.
Iimbuluma ohayi topolwa miitopolwa iyali, iimbuluma yuuhwapindi oshowo omiyonena dhomaliko.
Iimbuluma yuuhwapindi iimbuluma mbyoka hayi etitha uumbanda maantu na oyi na iilanduli moonkalamwenyo dhawo dhesiku kehe, pahapu dhaKanime omanga iimbuluma yomiyonena uulunga wayooloka.
Kanime okwa popi kutya iimbuluma oyindji ohayi ningilwa omahala gomOnooli-Uninginino womahala ngaashi Khomasdal nomalukanda gomoKatutura.
Unene iimbuluma yeteyo lyomagumbo ohayi holoka mOnooli-Uninginino.
Kanime okwa popi kutya iimbuluma yuuhwapindi otayi kwatakanithwa nonkalo ngaashi oluhepo nelongitho nayi lyiikolitha omanga uufudhi nuulunga tawu kwatakanithwa nonkalo yokuhala iinima.
Iinima oyindji mbyoka hayi yakwa ongaashi iikulya, iikutu, oongodhi dhopeke niilongitho nenge omakende.
Mayola gwaVenduka Muesee Kazapua okwa popi kutya otaya tala komikalo dha yooloka opo ya kambadhale okulwitha iimbuluma ngaashi okutula po ekwatathano lya kola noshigwana, okuwapaleka omahala ngoka ge na omaluhwa oshowo okutula po omalamba gomomapandaanda.
Kanime naKazapua oya popi kutya otaya ka tula miilonga mbala omahwahwameko taga ithanwa “safer neighbourhood campaign” ngoka ga nuninwa okukondopeka ekwatathano noshigwana moka aakwashigwana taya vulu okukandula po iikumungu ya taalela omaushiinda gawo pamwe nopolisi opo ya vule okukandulapo omaupyakadhi.
Nonando ewapaleko lyomahala ngoka ge na oluhwa olya tulwa nale miilonga natango okwa pumbwa okutulwa momapandaanda omalamba noshindji osha pumbwa okuningwa.
Opolisi yaVenduka oya popi kutya nonando iipotha yomakwatonkonga oya shuna pevi okuyeleka niipotha mbyoka ya lopotwa omvula ya piti, iimbuluma mbyoka ohayi holoka olundji momahuliloshiwike unene pomahulilo gomwedhi na otayi kwatakanithwa nelongitho lyiikolitha.
Omiyalu odha ulike eshuno pevi noopresenda heyali miimbuluma yuuhwapindi okutameka omwedhi Januari okuyeleka nethimbo lya faathana omvula ya piti moka mwa lopotwa iipotha 59.
Iimbuluma mbyoka ohayi topolwa miitopolwa ngaashi omadhipago oshowo oonkambadhala dhomadhipago, omakwatonkonga, omayehameko kolutu nomiyeka kwahomatiwa.
Iimbuluma oyindji oya shuna pevi okuyeleka nomvula ya piti kalele komiyeka kwa homatiwa. Nuumvo iipotha yomiyekwa ya thika po-188 oya lopotwa okuyeleka niipotha 149 mbyoka ya lopotwa omvula ya piti.
Okutameka Januari omiyeka kwahomatiwa dha thika po-164 odha lopotwa oshowo iipotha yomiyonena dhomomagumbo 398 okuyeleka niipotha 195 mbyoka ya lopotwa omvula ya piti yomiyeka kwahomatiwa oshowo 442 yomiyonena dhomomagumbo.
Iipotha yomakwatonkonga ihamano oya lopotwa okuyeleka niipotha 14 mbyoka ya lopotwa momukakena gwethimbo lya faathana mo-2015. Iimbuluma yomiyonena dhomaliko oya shuna pevi noopresenda 2, sho kwa lopotwa iimbuluma 2 284 omanga omvula ya piti kwa lopotwa iimbuluma 2 230.
Iimbuluma yomiyonena dhomaliko oya kwa telamo eteyo lyomagumbo, uulunga wiihauto, uulunga okulongitha iineya oshowo uulunga tawu kwatakanithwa nuushina wokunana iimaliwa ano uuATM.
Omiyalu odha ulike kutya uumbudhi taku longithwa iineya owa londa pombanda okuyeleka nomvula ya piti, sho muule owala womwedhi 3 kwa lopotwa iipotha 123 omanga omvula ya piti ethimbo lya faathana kwa lopotwa iipotha 95.
Uulunga nawo owa londa pombanda sho kwa lopotwa iipotha 1 191 okuyeleka niipotha 1 155 mbyoka ya lopotwa omvula ya piti.
Opolisi oya holola kutya e yo pombanda otali etithwa kiipotha yuulunga moositola oshowo ompumbwe yelongo lyoshigwana nge tashi ya kiikengelela. Iipotha yeteyo lyomagumbo oya shuna pevi okuza piipotha 650 mbyoka ya lopotwa omvula ya piti okuya piipotha 586 mbyoka ya lopotwa nuumvo.
JANA-MARI SMITH