Konyala aakiintu yaali mOvenduka okwa lopotwa ya nhuka mo mootaxi tadhi ende omolwa omapopyo gomaulodhi gakwatathana nomayoka.
Opolisi oya kunkilile oshigwana shi kale sha ngungumana.
Omuhingi gwotaxi mOvenduka okwa ningilwa omapulaapulo kopolisi mEtitano sho omukiintu omunamimvo 24 a nhuka mo motaxi ye.
Omukiintu ngoka okwa lombwele o Namibian Sun kutya okwa tokola okunhuka mo motaxi sha landula omahokololo gomukiintu ngoka a si aniwa konima sho a li a tulwa eyoka pokati komagulu ge omanga a li motaxi.
Omukiintu ngoka okwa hokolola kutya okwa londo otaxi okuza momudhingoloko gwaTjomuise nasho a mono omuhingi tayi ondjila ya puka okwe mu pula ihe omuhingi gwotaxi ndjoka aniwa okwemu yamukula kutya oya kana.
Omolwa uutile omukiintu ngoka okwa nhuka mo motaxi na okwa holama piishwa yopopepi na okwa ithana omumwayinamati e ke mutale. Okwa popi kutya omuhingi gwotaxi ndjoka ina thikama konima sho a nhuka mo.
Omupopiliko gwopolisi, Slogan Matheus okwa koleke natango oshiningwanima shimwe moka omukiintu a nhuka motaxi.
Omukiintu ngoka okwa popi kutya aafalelwa motaxi ndjoka oyali ye na okanona okashona hoka ke na omeho omatiligane sha etitha omukiintu ngoka a nhuke mo motaxi.
Sho a ningi omutumba niikundaneki mEtitano, Omupeha kOmufala Ismael Basson opolisi otayi konaakona omapopyo ngoka taga kwatakanithwa nomayoka mootaxi na okwa pula aakwashigwana ya lopote kehe omainyengo taga limbilike.
Omupolisi gumwe okwa popi kutya otashi vulika aantu ya kiimonithe iiponga omolwa uumbanda.
"Moshiningwanima moka okakadhona ka nhuka motaxi, ongiini mbela ngele omuhingi gwotaxi nomufaalelwa gumwe oya li owala taya popi kombinga yiinima mbyoka tayi popiwa, ko okakadhona otaka nhuka mo motaxi. Aantu oya tila," omunambelewa ngoka ta ti.
Basson okwa pula aahingi yotaxi ya thikame nokutala shoka sha puka uuna aafalelwa yawo ya nhuka mo moohauto dhawo.
kombinga yuutile okwa popi kutya aanhu mboka ya tila inaya iyendela, yo naya tumine ookuume nenge aakwanezimo uukwatya wiihauto moka taya londo.
GORDON JOSEPH
Category: