Omuleli Hage Geingob okwa popi kutya anangeshefa mboka ya hala okuninga aakengeli muule wesiku limwe ohaya ningi aalongi yuulingilingi.
Geingob okwa popi ngaaka pethimbo a patulula omatala gokulandithila taga ithanwa Frans Indongo Open Market mOshakati mEtitano na okwa pula aantu ya longe nuudhiginini.
"Opo wu pondole sha mongeshefa owa pumbwa okulonga nuudhiginini noneyidhidhimiko," Geingob ta ti.
Omatala ngoka oga tungwa kongushu yoshimaliwa shoomiliyona 90 na otaga vulu okukala naalandithi ya thika po-500. Omatala ngoka oge na oshungo yuule yoometre 49 oshowo okapale koomalondekelo goombesa. Geingob okwa popi kutya epangelo oli shi ongushu nesimano lyaanangeshefa yopetameko moonkambdhala dhokukandulapo nokukondjitha oluhepo.
"Paku gandja iikwaniipangitho yomondjila kAaNamibia opo ya vule okuninga oongeshefa dhawo, otatu gandja emanya lyokulondela opo oongeshefa dhawo dhi vule okukoka nokuninga oongeshefa oonene monakuyiwa."
Geingob okwa popi kutya iikwaniipangitho ngaashi omatala ngoka gaFrans Indongo Open Market oyi na onkandangala onene keyambulepo lyaNamibia nepangelo olya pumbwa okutunga moshilongo ashihe omatala goludhi ndoka.
Moshipopiwa she shoka sha leshwa pehala lye kuMartin Shipanga, ngoka eli omunashipundi gwoFrans Indongo Group, Frans Indongo okwa pula aanangeshefa ya tamekele petameko.
"Oshi li ondjodhi yandje opo omatala ngaka ga yambidhidhe aalandithi ya ninge oongesdhefa dhawo nokumona onakuyiwa yongeshefa ombwaanawa."
"Okutameka ongeshefa oshona kashi shi esithahoni. Etameko oli na oshilonga. Okukala nondjodhi yopangeshefa osha simana, longitheni omatala ngaka onga omatamekelo geni monkatu yeni yopangeshefa," Indongo ta ti.
Sho a popi pehala lyaalandithili momatala ngoka, Martha Elifas okwa popi kutya okwa nyanyukwa sho ya tulululwa okuza komatala ngoka omakulu nokutulwa momatala ngoka omape.
Okwa popi kutya olugodhi lwokumona ehala tali kalele lyokuningila ongeshefa olwa hula na okwa pandula epangelo.
KENYA KAMBOWE
Category: