Ominista yEmona Calle Schlettwein okwa popi kutya ota kongo omikalo dhoka tadhi vulu okuhupitha ondolopa yaShikango na itashi tula oshilongo ashihe muupyakadhi.
Sho a popi noNamibian Sun, konima sho a galuka kOshikango hoka a ningi omutumba naanangeshefa, Schlettwein okwa popi kutya uuministeli we pamwe nOmbaanga yaNamibia otaya ka tuma aanambelewa mondoolopa ndjoka opo ya ka uveko onkalo yondoolopa.
Oshikango osha taalela uupyakadhi wonkalo yopaliko onga oshizemo shuupyakadhi mboka wa taalela oshishiindalongo Angola.
Ondando yomahooli ndjoka ya gu pevi, sho Angola e li iikolelela owala momahooli oya gumu Namiba, sho ondoolopa ndjoka yiikolelela woo maalandi Aangola.
Ekaleko lyepingakanitho lyiimaliwa pokati kaNamibia naAngola mOshikango naSanta Clara nalyo olya nayipalitha onkalo yongeshefa mondoolopa moka.
Kwiikwatelelwa komiyalu dhoka dha gandjwa, Aanamibia mboka ya kanitha iilonga yawo pokati kaJune 2015 naFebruali gwo-2016 ogwa thikama po-719 naantu oyendji oya kuthwa miilonga omwedhi gwa piti.
"Onkalo yeliko lyaAngola oya guma noonkondo Oshikango molwaashoka onkalo yongeshefa oya shuna pevi. Kamu na ongeshefa mOshikango," minista ta ti.
Pahapu dhaminista nonando epingakanitho ndyoka olya li lya tulwa miilonga li hwepopaleke onkalo inali e ta iizemo iiwanawa.
"Epingakanitho olya li ondunge ombwaanawa ihe Angola ina gwanitha po euvaneko molwaashoka sigo onena oshilongo shoka oshi na iimaliwa yetu yoobiliyona dhontumba. Itatu vulu okukalekapo etsokumwe ndyoka tali tula oshilongo shetu moshiponga," Schlettwein ta ti.
Okwa popi kutya uuministeli otawu ka konaakona omagwedhelepo ngoka ga ningwa kaanangeshefa mOshikango opo onkalo ndjoka yi hwepopalekwe.
"Aanangeshefa oye tu pe omayele gamwe ngoka tatu ka tala, nokutothamo ngoka taga vulu okulonga wuuwanawa wetu," Schlettwein ta ti.
MERJA IILEKA
Category: