Omupresidende gwoDTA McHenry Venaani oshiwike sha piti okwa yi moonkundathana naakalelipo ya za komahangano gaalongiskola opo ya kundathane omikalo dhokuhumitha komeho oshikondo shelongo.
Nonando iikundaneki inayi pitikwa okukala momutumba ngoka gwa ningwa, Venaani okwa popi kutya omutumba ngoka ogwa ningwa gwa nuninwa okukundathana omaupyakadhi ngoka ga gumwa oshigwana unene koshikondo shelongo.
"Otu na uupyakadhi moshikondo shelongo. Otatu gandja iimaliwa oyindji koshikondo shika ihe kape nashoka tashi ningwa po. Otwa hala okumona omikundu dha taalela aalongi yetu oshowo shoka tashi etitha ondjele yili pombanda yendopo," Venaani ta ti.
“Oshilongo otashi ti otu na ondjele yokwaahena iilonga yili pombanda ihe inashi ninga po sha shoka sha pumbwa okuningwa."
Venaani okwa popi kutya ongundu yawo oya kala tayi pula opo ku totwepo iiputudhilo yopaungomba mbyoka tayi vulu okukandulapo omukundu gwokwaahena iilonga.
Okwa popi woo kutya okwa li a hala okuuva onkalo yaalongi ngaashi mboka taya longele monkalo ya nayipala.
"Aalongi otaya zi momagumbo gomalowa. Otwa hala okuuva omaiyuvo gomahangano mokukandulapo omaupyakadhi ga taalela aalongi noshikondo shelongo. Otu na uupyakadhi waalongi oyendji mOvenduka omanga katu na aalongi kiitopolwa yokuushayi," Venaani a yelitha.
Venaani okwa yelitha kutya omutumba ngoka kagu na sha nopolotika ihe okumona owala ethano lyomondjila kombinga yonkalo yoshikondo oshowo kutya omahangano ngoka otaga kondjitha shike.
Omupeha Omupresidende gwoTUN Ndjizuvee Haakuria, okwa popi kutya ehangano lyawo olya pyakudhukwa okuya moonkundathana na kehe gumwe mokuyambulapo onkalonawa yokanona okaNamibia.
"Nguka kagwa li omutumba gwopapolotika ihe ompito yokutopolelathana shoka tashi inyenge moshikondo shelongo. Ondiinekela oongundu dhopolotika dhilwe otadhi landula moompadhi dhoka."
MERJA IILEKA
Category: