Omupresidende Hage Geingob okwa manitha etalelepo lye ndyoka aningile oombelelwa oonene dhOshikondo shEgameno sho atalelepo okamba yoPN Sacharia Naval Base oshowo Naval Training School noTashiya Wilbard Military Base moRooikop popepi nOmbaye mEtine lyoshiwike sha piti.
Omupresidende okwa simanekwa neumbo lyoondjembo iikando ya thika po-21 molwaashoka ndyoka olyo lyali etalelepo lye lyotango.
Okwa talelepo woo oombonge oonene dhoarmy mOshaanda oshowo oombonge dhetanga lyOmewanangandjo moKaribib kuyele oshiwike sha piti.
"Otandi shi popi nomukumo kutya egameno lyEvi lyOmapendafule oli li miikaha iiwanawa. Iilyo yoshikondo shoka oya ulike epyakudhuko lyawo noonkondo dhokugamena Namibia oshowo endjangumuko lyawo lyokukutha ombinga miinyangadhalwa yi na sha nekalekepo lyombili ngaashi okugandja omayakulo gopauntu oshowo omakwatho pethimbo lyomaupyakadhi gopaushitwe," omupresidende tati.
Okwa dhimbulukitha iilyo kutya oya gana opo yi gamene Ekotampango lyaNamibia okuza kaatondi ayehe na okwe ya dhimbulukitha kutya inaya dhimbwa esimano lyiilonga yawo koshigwana. Onda tegelela nomukumo etamekitho lyoMarine Corp nuumvo. Oshikondo shEgameno lyomOmeya osha pondola epondolo enene sho sha totopo oMaritime Wing muSepetemba gwo-1998 momasiku 11 oshowo etotepo lyoNavy mo-2004. Shoka osha landula etotepo lyoMarine Corpos mo-2005 oshowo Navy Training School mo-2009."
Omupresidende okwa holola woo enyanyu lye omolwa iilonga ya longwa kOshikondo shomOmeya na okwa gandja woo olupandu kuSouth Afrika naBrazil mboka ya dhana onkandangala onene medheulo oshowo megandjo lyiikwanipangitho yoshikondo.
"Ondi na ontseyo yiilonga yoshikondo okugamena oshinano shookilometa 1572 momukulofuta gwoshilongo nomilonga. Oshilonga shika osha simana noonkondo molwaashoka omunkulofuta gwetu ogwa yambekwa nuuyamba woonzo dhopaushitwe dhoka dhali tadhi vulu okukala tadhi kuthwapo koongangala ngele inadhi gamenwa."
"Okukala oshilongo oshishona oshina uuwanawa koshikondo shEgameno na otashi gandja ompito opo oshikondo shikale kehe pamwe. Namibia okuli kuume ka kehe gumwe na kena omutondi," omuleli ta ti.
Komanda gwoNavy yaNamibia, Rear Admiral Peter Vilho, okwa pandula omupresidende sho a holola esimano lyooprograma shegameno.
"Oshikondo shomOmeya osha gwanitha oomvula 12 na otwa pondola oshindji mokuyambulapo oshikondo shegameno koonono muule wethimbo ndyoka. Ngashiingeyi otwiipyakidhila nekuthombinga miinyangadhalwa ya yooloka na otatu indile wutu kwatele komeho opo tu pule komeho nooprogramma dhoka uule woomvula omulongo twa taalela."
Ominista yEgameno, Penda Ya Ndakolo okwa pula iilyo yOshikondo shEgameno lyomOmeya yi kale ya angala nokugamena oshilongo okuza komashongo ageye.
OTIS FINCK