Oonakukala poshituthi shoka sha ningilwa ookusa omu-15 mboka ya hulitha sho okambesa moka yali kiidhenge mumwe neloli mondjila yaOshivelo-Omuthiya oya popi kutya osha puka okutumbula kutya omaipumo mumwe ngoka iiponga.
Oya popi kutya aalongithindjila oyo taya pelwa ombedhi iiponga omaipumo mumwe ngoka noomwenyo otadhi kana omolwa omaihumbato omawinanyi gaahingi ngoka taga vulu okulundululwa.
Ethimbuluko ndyoka olya ningwa mEtine pehala mpoka pwa holokele oshiningwanima momasiku o12 gaFebruali noshituthi shoka osha kaliwa kaalilisa omathele nomathele.
Aakwanezimo yoonakusa, aanambelewa yepangelo oshowo aakalelipo yomahangano ga yooloka naakwashigwana oya gandja esimaneko lyawo koonakusila moshiningwanima shoka oshinyanyaleki.
“Otatu tindi okuzimina kutya omaipumo mumwe ngaka oge li iiponga,” omukomeho gwEhangano lyoMotor Vehicle Accident (MVA) fund, Rosalia Martins-Hausiku ta ti.
Martins-Hausiku okwa popi kutya iiponga ohayi holoka ngele omuntu keshi kutya oshike tashi vulu okuholoka.
Okwa popi kutya aalongithindjila oyeshi shi nawa kutya omatokolo kehe taya ningi otaga vulu okweeta oshizemo shi li ngiini.
Okwa popi kutya iiponga ya thika po-700 oya lopotwa omvula ya piti moondjila dhaNamibia omanga iiponga ya thika pe-100 ya lopotwa nuumvo nomiyalu dhoka otadhi halukitha noonkondo onkene aahingi oya pumbwa okulundulula omaihumbato gawo uuna yeli moondjila.
“Osha gwana na oshagwanena. Atuhe otwa pumbwa okuthikana nokukala ompinge nekanitho lyoomwenyo momukalo ngoka.”
“Otwa pumbwa okulundulula omaihumbato getu molwaashoka ogo taga etitha omaso.”
Ominista yIilonga nOmalweendo Alpheus !Naruseb, okwa popi kutyanonando aantu yamwe otaya popi kutya oyeli aahingi ya pyokoka itaya vulu okukondolola iihauto uuna pwa holoka sha omanga ohauto tayi tondoka noonkondo.
“Ngele nena omatokolo getu okwaahasimaneka nokulandula oompango dhomoondjila oshowo okulongitha iinima mbyoka tayi gumu uuluwi wetu nena itashi kala oshiponga,” minista ta ti.
Naruseb okwa popi kutya okuhingilila unene oshi li shimwe shomiiyetithi unene yomaso moondjila.
“Okuhingilila otaku e ta eso. Ohauto otayi vulu okukala niinima ayihe yopashinanena ihe oto vulu oku gwedha komiyalu,” Naruseb ta ti.
Omukomeho gwOpolisi yaNamibia, Sebastian Ndeitunga okwa tseyithile oshigwamna kutya omalutu agehe ngoka ga pya ga thika po-13 oga pwa okudhimbululwa na okwa gandja ombili koofamili sho sha kutha ethimbo ta ti, opolisi oya li ya hala opo kugandjwe omalutu gomondjila kaakwanezimo.
Ndeitunga okwa popi kutya iiputudhilo ngaashi MVA Fund ohayi ningi omahwahwameko gekaleko lyegameno moondjila ihe nonando ongaaka omiyalu onkene tadhi londo pombanda.
Ndeitunga okwa nyana woo aahingi inaya pyokoka mboka taya mono omikanda dhokuhinga okuza miiputudholo yepangelo oshowo ooskola dhokuhinga.
KENYA KAMBOWE
Category: