Ehangano lyomatukodhila gaNamibia, lyoAir Namibia olya tindi omapopyo ngoka taga ningwa kuyamwe po yomaaniilonga kutya otali ningi oonkambadhala dhokukutha miilonga mboka kaayeshi AaNamibia na oye na omikanda dhaaluhe dhokukala moshilongo.
Omukomeho gwomauyelele mehangano ndyoka Paulus Nakawa okwa popi kutya omapopyo ngoka kage na uukwashili washa.
"Ngele ope na eyo pondje lyOmpango yAaniilonga mokati kaaniilonga yetu otwa pyakudhukwa okukandulapo uupyakadhi mboka nUuministeli wAaniilonga . Air Namibia ota tsikile nokukuta miilonga AaNamibia ayehe nuukwatya wawo wa yooloka," Nakawa ta ti.
Aaniilonga oya popi kutya omukomeho gwehangano Mandi Samson oye ta hwahwameke onkalo ndjoka paku popya omatumbulo ngaashi "aahingidhila aaluudhe""naahingidhila aatiligane" pethimbo lyomitumba dhelelo lyehangano.
Natango Nakawa owa tindi omapopyo ngoka.
Okwa popi kutya okutameka muKotomba gwomvula ya piti okwa kala moonkundathana nelelo oshowo okomitiye yoAffirmative Action (AA) nopethimbo lyoonkundathana dhoka iilonga yaaniilonga oshowo omaukwatya gawo oya kundathanwa.
“Itashi vulika wu popye kombinga yoaffirmative action ito tumbula olwaala nenge uukwatya womuntu," Nakawa a yelitha.
Nakawa okwa popi kutya omulandu ngoka otagu ningwa taku landulwa oompango nomilandu dhomondjila dhoka dha kala nale miilonga.
"Shika oshinima tashi endele pamwe nEkotampango lyOshilongo. Kashi shi oshinima oshipe. Oshinima tashi tsikile shoka sha pumbwa okutalika."
Okwa popi kutya ehangano lyawo olya yama kepangelo na oli na oshinakugwanithwa shokutala iitalenti yaaNamibia nokuyilongitha mondjila.
Air Namibia oku na aaniilonga yaaheshi Aanamibia mboka taya longo moshikondo shiilonga nuutekinika. Moka omwa kwatelwa aahingidhila 17 mboka unene ookaptaina, ooindjinia oshowo aaniilonga moshikondo shiiyemo nomayakulo gopaupale woodhila.
Nakawa okwa popi kutya Air Namibia oku na ooprogramma dhokuyambulapo aanyasha AaNamibia.
Okwa popi kutya aahingidhila 92 ya kutwa kehangano monena ayehe oya pyokoka noopresenda 82 dhomaahingidhila mboka AaNamibia omanga 18 aazaizai.
Oopresenda 70 dhaahingidhila aatiligane omanga 30 aaluudhe. Air Namibia okwe shi pondola owala okutula ookapataina ndatu yoshipa oshiluudhe momalweendo ge gopashigwana.
Ekanka
Lyopotati mpoka aaniilonga yehangano lyoAir Namibia mboka haya enda enda noodhila oya ningi enyenyeto kOmbelewa yaKomufala gwAaniilonga konima sho oonkundathana dhoondjambi dha adha okwena kwa thita.
Ehangano lyoNamibian Cabin Crew Union (NCCU) olya shunitha pevi oopresenda 12 dhoka lya kala tali pula sigo opoopresenda 8 ihe Air Namibia okwa popi kutya okwa pyakudhukwa owala okugandja oopresenda 7.
Omupresidende gwoNCCU, Reginald Kock okwa koleke kutya ehangano lyawo oli li moonkundathana naAir Namibia nehangano otali ka kala nomutumba naKomufala gwAaniilonga momasiku 24 gaMaalitsa moka taya ka ninga eindilo lyonzapo yokuninga ekanka.
CATHERINE SASMAN