Uuyelele mboka owe ya polweela pethimbo lyomutumba gwelelo lyongundu tali ithanwa Executive Committee (CEC) gwoohamushanga yoongundu dhoka dha yama kongundu ndjoka ngoka gwa kundathana olopota ndjoka ya li ya pitithwa koshifokundaneki shoNamibian Sun kombinga yomafekelo geli mongundu ndjoka. Omutumba ngoka ogwa ningwa mehuliloshiwike.
Yamwe po yomeni oya popi kutya ongundu ndjoka oyi na oshiholekwa moka yamwepo yomiilyo ya hala okuya moshipala ehogololo lyaHage Geingob onga omupresidende gwoSwapo pethimbo lyomahogololo ngoka taga ningwa momvula twa taalela.
Molwaashoka ehangano ndyoka oli na ekwatathano noSwapo, nena oli na uuthemba wokukutha ombinga momahogololo ngoka taga ningwa.
Amushanga-Ndjai gwoNamibia Financial Institutions Union (Nafinu), Asnath Zamuee, okwa hololwa a shanga omukanda moka a popi yimwe yomiitsa yi li pombanda.
Nonando Zamuee okwa zimine kutya okwa shanga omukanda ngoka okwa tindi okuya muule wookundanthana kombinga yiitsa mbyoka a holola momukanda ngoka.
"Kandi shi kutya ombapila ndjoka omwe yi mono ngiini ihe ombapila ndjoka oya nuninwa aaleli yomahangano omakalelipo gaaniilonga kayi shi yaantu yopondje," Zamuee ta lombwele oNamibian Sun sho a ningilwa omapulaapulo.
Mombapila ndjoka ya monika koshikundnaeki shika, Zamuee okwa shanga kutya Nafinu okwa hala okuholola omaiyuvo ge kutya ina nyanyukilwa omukalo ngoka omutumba gwoCEC gwa ningilwa.
Uukwamuhoko
"Otwa dhidhilike kutya iilyo yimwe yoCEC otayi hwahwameke uukwamuhoko. Pethimbo lyomutumba gwoCEC ngoka opo gwa ningwa okwa ningwa omapopyo guukwamuhoko moCEC itayi popile omaihumbati ngoka, "Zamuee a shanga.
"Omagwedhelepo kombinga yomatokolo ga nuninwa okuningilwa amushanga-ndjai gwoNUNW Job Muniaro oshowo Omuprsidende ismael Kasuto ogali ga nuninwa okuya topolwa ngaashi ekutho miilonga."
Zamuee okwa holola kutya omagwedhelepo ngoka oga ningwa molwaashoka ayehe mboka yaali "AaHerero'
"Kehe gumwe ota vulu okudhilaadhila kutya mboka yaali naya topolwe omolwa omihoko dhawo."
Okwa popi kutya omagwedhelepo ngoka oga talikako onga iiyolitha pethimbo lyomutumba ngoka molwaashoka inaga nyanwa koCEC.
Olwaamambinga
Momananathano ngoka geli moNUNW, Zamuee okwa popi iilyo yimwe oya yi komutumba gwoCEC nokugama koombinga dhimwe.
Okwa popi kutya onkalo ndjoka otayi shundula ongushu yiikundanthanwa momutumba na okwa pula iilyo yi kale ya mangulula okugandja iitsa yawo nenge pethimbo lyoompata dhontumba.
Zamuee okwa popi kutya iilyo mbyoka ya gandja omaiyuvo ga yooloka pethimbo lyomutumbva ngoka oya lombwelwa yi kuutumbe na okwa hololwa omaiyuvo kutya iilyo itayi ihumbata muuwanawa yehangano.
Oshikumungu shaHage
Aantu yomeni oya popi kutya ope na iilyo yimwe mbyoka inayi hala Geingob a hogololwe onga omupresidende gwoSwapo nokushuna koshipundi shuuleli woshilongo oshikando oshitiyali.
"Omu wete kutya NUNW ke na omukalelipo mepangelo lyopaife molwaashoka oya li taya yambidhidha aahogololwa mboka inaya pondola okusindana pethimbo lyomutumba gwo2012 naantu mboka monena oyuuvite nayi," gumwe gwomiilyo yehangano ta lommbwele oNamibian Sun.
Geingob okwa kala ta longo pehala lyomupresidende gwoSwapo shalandula sho omupresidende nale Hifikepunye Pohamba adhigi po oshipundi shoka nokuya moshipundi shevululuko kuyele omvula ya piti.
Ngashiingeyi oompangela dhawo okunyana epangelo lye nakehe shoka ta ningi opo aaniilonga ya mone ethano lya puka yo kaye ke muhogolole momvula twa taalela," onzo yimwe ya holola.
Osha li sha popiwa komupeha amushanga-ndjai gwoNamibia Public Workers Union (Napwu) Gabes Andumba kutya Muniaro naKasuto naya topolwe molwaashoka AaHerero.
Sho a ningilwa omapulaapulo Andumba ina zimina nenge a tinde omapopyo ngoka.
Osha holoka kutya Andumba naPeter Nevonga gwoNapwu oyo taya kondjitha ekutho miilonga lyaKasuto naMuniaro.
Onzo yimwe oya holola kutya shoka otashi ka gandja ompito komupeha minista nale gOshikondo shEgameno, Peter Iilonga opo a shune miilonga yekalelepo lyaaniilonga sho oye ta talika omeho kutya ota pingenepo Kasuto.
Sho otashi ulike kutya Iilonga ota ka kala pompito ombwaananwa pethimbo lyomahogololo gomvula twa taalela opo a ka kwatele komeho oompangela dhili ompinge naGeingob.
"Mbyoka iipolopolo," Andumba a yamukula.
"Ngoka e ku lombwele ngaaka ota popi iipolopolo, shuna ko kuye e te ku lombwele shoka ya hala."
Nevonga naye okwa ekelehi omapopyo ngoka na okwa tindi okutya sha kombinga yombaapila ndjoka ya shangwa kukuZamuee.
Kasuto naye okwa tindi okutya sha.
Muniaro naIilonga inaya vula okumonika.
ELVIS MURARANGANDA