Ompangu yaMangestrata gwaVenduka mEtitatu oya pula opo omulumentu ngoka ta tamanekelwa edhipago lyaakiintu yaali, Lukas Nicodemus a ka ningilwe omakonaakono gopamadhilaadhilo.
Nicodemus ota tamanekelwa edhipago lyaakiintu yaali mboka omalutu gawo ga adhika ga hwikwapo metoto lyiiyagaya popepi noPionierspark, mOvenduka muJanuari.
Omupanguli Ilge Rheent okwa gandja ezimino meindilo lya ningwa komukalelipo gwomutamanekwa Milton Engelbrecht.
Mangestrata okwa gandja elombwelo opo Nicodemus a ningilwe omakonaakono noshipotha she osha undulilwa komasiku ga8 gaApilili.
Nicodemus ota tamanekelwa iipotha iyali yedhipago oshowo onkambadhala dhokuya iilonga yuuyuki moshipala.
Ota tamanekwa kutya okwa dhipaga Clemencia de Wee, 23, naJohanny Naruses, 29. Omidhimba dhaakiintu mboka odha adhika metoto lyiiyagaya mOvenduka momasiku ga6 gaJanuari nuumvo na oga dhimbululwa kaakwanezimo.
Nicodemus ina zimina ondjo na oku li mondjedhililo moSeeis popi nOkapale kOmatukodhila goPaigwana kaHosea Kutako sho a pula opo kaa falwe kosasiyona yondjeedhililo yOpolisi yaVenduka omolwa egameno lye.
Aakeleli yetoto ndyoka oyo ya mono omidhimba dhaakiintu mboka ongula ya landula.
Opolisi oya kwatako ohauto yolwaala oluluudhe yoGolf GTi yaNicodemus konima sho ya adhika ya dhigwa pehala lyontumba moshilando na okwa adhika oombinzi mohauto ndjoka.
Opolisi oya mono uuyelele okuza mokakalata kongodhi yopeke ka adhika kugumwe gwomoonakusa na oko ka falitha metulo miipandeko lyaNicodemus.
FRED GOEIEMAN
Category: