Shoka oshe ya po sho ngoka ta longo pehala lyamushanga gwoSPYL Veikko Nekundi a popi kutya aanyasha oya pumbwa okusimaneka aakuluntu onga 'aanona Aafrika'.
Geingob ngoka ta longo woo pehala lyomupresidende gwoSwapo, okwa popi kutya omanga elelo lyongundu lya kala lya taalela omaponokelo okuza koombinga dha yooloka, aanyasha inaye li gamena.
Geingob okwa popi kutya kehe gumwe ota vulu okumona onakuziwa yomuntu shiikwatelelwa komukalo ngoka hiihumbatele aakuluntu.
"Otandi vulu okunyenyeta nOmupresidende Sam Nujoma nenge kehe gumwe ihe itandi longitha omalaka omawinayi ngoka taga ulike okwaahena esimaneko molwaashoka onda tekulwa nawa," Geingob ta to.
"Itandi kiipyakidhila nomuntu ngoka ina za megumbo ewanawa nenge ina tekulwa nawa, itandi uvithwa nayi kwaashoka. Osha fa owala odhi tayi tuka iho uvithwa nayi kodhi tayi tuka ohoyi hingile owala kokule."
Omupresidende okwa popi kutya pehala shapo ota simaneke omuntu ngoka e na omayele gongushu pehala lyaamboka taya ula yakwawo kutya "oozombie' nenge 'aantu mboka haya yi koombelewa dhina omipepo dhombepo ontalala".
"Ombelewa yi ni hokuutumba moUniversiti ihe kayi na ombepo ontalala? Opena ho zi? Yamwe otaya futu ohiila yooN$9 000 komwedhi, shoka kashi shi ombashu."
"Ngele inaya simaneka aaleli ya etheni. Shoka ka shishi uupyakadhi weni ihe otashi ulike owala uuteku wawo, onkene ihumbateni nawa ngele omwa za momagumbo mwatekulwa na omushi omulandu gwaSwapo."
Nekundi okwa popi kombinga yonkandangala ndjoka Geingob a dhana meeto lyemanguluko oshowo omukalo ngoka ompito dhuuleli dha taambathanwa okuza kuNujoma sigo okuGeingob.
Nekundi okwa pula aanyasha yewawa ndyoka ya simaneke aakuluntu.
ELVIS MURARANGANDA
Category: