Oshiningwanima shoka osha thigi aakwashigwana momalimbililo nomapulo ogendji.
Mwene gwomukunda Abisai Shikulo okwa hokolola uufuthi mboka womamanya ga thika pu gane kutya omukalo tagu etitha uutile omanga kansela gwoshikandjohogololo shoka, Hanu Kapenda a popi kutya shoka otashi ulike nkene ohole yiimaliwa tayi hanagulapo oshigwana shaNamibia. Omamanya ngoka oga yakwa koombila dhoonakusa Toini Nashipolo, Martha Raimund, Michael Nambadhi naJohannes Iimene.
Kapenda okwa holoka kutya ndjoka onkalo tayi tilitha molwaashoka omawendo oga kala ga talikako monakuziwa yopamuthigululwakalo kutya ehala hali tilika na kape na andola ngoka ta vulu okuyaka sha okuza momawendo.
Uulunga mboka owa dhimbululwa komweendi gokolupadhi ngoka a notheleko aakwashigwana momasiku 27 gaFebruali na kape na ngoka e shi shi kutya iikulumuna mboka oya longwa uunake molwaashoka omayendo ogeli kehala lyiikalekelwa hoka ihaku endaendwa unene.
Okwa ninga owala efumbiko limwe momawendo ngoka nuumvo.
Otaku hokololwa kutya omukiintu ngoka a li ta ende popepi nomawendo okwa mono kutya omamanya gamwe komawendo kage ko na okwa tseyithile oshigwana niipoitha yuulunga oyapatululwa nopolisi yaNdangwa.
Ongushu yomamanya gondilo ngoka ga yakwa inayi tseyika natango. “Otwa hala opolisi yi ninge omakonaakono nokumona oongangala dhoka tadhi teyagula oombila,”
Barakias Lazarus ta ti. Lazarus okwa popi kutya oshigwana otashi teyagulwapo kohole yiimaliwa.
“Ngame ondi na oomvula 84 na inandi uva nale iimbuluma yafa mpoka.”
Aakwashigwana oshowo aakwanezimo oya popi kutya otaya fekele kutya oongangala otadhi yaka omamanya gokoombila ngoka gondilo opo dhike ga landithepo.
“Otuuvite nayi molwaashoka iinima yoludhi ndoka inayi holoka nale na inatu yi uva,” Rehabeam Iita a popi pehala lyaakwanezimo.
Aakwashigwana yamwe oya pula opo omawendo ga tulwe modhalate nayamwe oye wete kutya odhalate itayi kala ekandulepo lyomukundu.
PLACIDO HILUKILWA